Raltlan Chin nu Meithal thawn kap that a si

Thlanglam laitlang Paletwa khuasung ih um Aukmi Letwah raltlan pawl cu tik-thing lak dingin laawng thawn an feh lai ah zo ti theilo in meithal thawn a kap hai ih kum 70 mi nunau pakhat a thi tiah theih a si.

Tuzing nazi 9:30 hrawng ah rawlsuan nakding thing lak tum ih feh Aukmi Letwah raltlan pawl, laawng an to lai ih kah an tuar mi a si ih thing khal lak man lo in an tlan ṭheh sal thu, thing lak dingih telve mi pakhat in Chin Human Rights Organization hnen ah a sim.

Amah cun, “tiva ralkhat lam ah minung 10 hrawng in tik-thing lak dingin tuzing nazi 9:30 hrawng ah kan feh ih khua kan thlen hlan ah hramlak ihsin meithal thawn in rak kap. Thing khal lak man loin kan tlan ṭheh ih laawng par kan thleng hnu ah Daw Hoih Khin an kap ngah. Cerek in a el ah a ngah ih a pum hmailam tiang in a pop thluh. Operation tuahnak ah zohciang dingin an ret” tiin a sim.

Hih thuhla thawn pehpar in Aukmi Letwah khawUk khal in “Hinah ih um kan khua pawl rawlsuan nakding thing kan nei nawn loih thing lak dingin minung 10 hrawng an va feh. Khua an thleng hlan, raalkhat hramlak ihsin an rak kap ih an rak kir lohli sal. Pi tar pakhat an kap ngah ih a hmun rori ah a thi.A ruang zohfelnak an nei hnu zaanlam nazi 1 hrawng ah an phum” tiin a sim.

Ralkap lam in a ruak zohfelnak an nei. Zoih kap mi a si ti theih a si lo nan an kap nak kiangkap hrawngah ralkap ခလရ (၂၈၉) hmunkhuar in an um ti cu theih a si.

Aukmi Letwah khua cu Paletwa ihsi nisuahnak lam ah a um ih inn 130 hrawng a si. Kawl ralkap le AA buainak ruangah an inn le lo tamzet a siat. Boom thlak khal an tuar ṭheu ih hliamhma tuar thi le hlo khal an um ruangah khuasung mi pawl cun 19/02/2020 ah thinphang in an khua an suahsan ih Paletwa ah raltlan dinhmun in an beu.

26/05/2020 khal ah zo ti theilo mi in Aukmi Letwah khua cu a urkang ih inn 100 lenglo a kangral thluh. An khua a kang hnu haal ding ih vafeh laawng pahnih khal zo ti theilo in meithal thawn an kap ih zoh khal zoh man lo in an tlan thluh sal ti a si.

ref : CHRO

One thought on “Raltlan Chin nu Meithal thawn kap that a si

  • June 4, 2020 at 11:05 am
    Permalink

    Falamonlinemedia.com nan tuah mi hi a tha tuk… kei tla tel ka duh ve …
    Lung awi …

    Reply

Leave a Reply

Your email address will not be published. Required fields are marked *