Ralring : Mibumhmang Lal Muan Pui a cangvai lala

Kum 2019 lam ah Singapore Agent sivekin ram dang ah mi ka kuat thei tiih mitamzet rak bum ruangih thawngtlak LalMuanPuia cu thawnginn in a suaksal hnu khalah a mizia hlun suah in mi a bum ciamco lala.

Kum 2019 ah mipakhat ting 30 zinin ramdang ah ka kuat thei ti`n mibumtu puaisa lem LalMuanPuia cun a bum ngah mi Kyat ting 800 luan a rak tlanhlopi dah ih palik hnen ah report theh lut in an rak kai dah zomi a si.

Atu ah kum 2 zik hrawng thawng a tla hnu, a suak saal hnu ah Facebook page tuah in mi a bum thok lala. Thawnginn ihsin a suak thei dan khal, a puzawn (a nupi` pa) bum in a suak sal theimi a si.

A puzawn hnen ah paisa thawn in bail awla ka suak thei tikah ka bank account ih kyat ting 800 luan cu leiba rul nakah kan hmang dingih a tangmi hmuahhmuah cu kan sem aw thluh ding tiah a ti ih a puzawn in thungai ah ruatin paisa tamzet a cawi sak hlei ah Inn le Lo tiang zuar in Lalmuanpuia cu a bail suak.

Thawnginn ihsin Lalmuanpuia a suak taktak cu paisa cu zatzat a rak nei ngai lomi an thei suak saal nan ti dan ding lamziin a um lo ruangah a puzawn cu leiba tamtak thawn thinhar beidong in a um.

LalMuanPuia cu thawnginn ihsin a suak veten a mizia hlun suah in a cangvai thok. Nan, tuṭum ih a cangvai dan cu a danglam deuh. Facebook cahmai pakhat tuah in ramdang paisa kuat theih kan si tiah a theh lar aw.

India siseh Myanmar ram hmuntinkim ah kan mah rori feh in kan lo pek sak thei tiah a theh lar aw ih, mitam nawn cun zum ngaingai in a bank account tarlangmi ah paisa an thun cu, an thun ṭheh veten an pehtlaih thei nawn lo.

Myanmar ram paisa kuat duh hrang ah a nupi hlun bank account a hmang ih India ram hrangah a hnaṭuanpi pawl bank account an hmang.

Covid boruak lockdown le Kawlram buai thawn cozah bank ih sum lak/kuat a remcang lo ruangah mi tamzet cun a hnen in paisa an kuat ih a kuattu hmuahhmuah cun paisa an sung lak thluh.

A nupi hlun bank account an hmansakmi hi a thok ah a neitu in zianghman a rak thei lo. Paisa an thun lut veten a hnaṭuanpi nunau pakhat in lalmuanpuia nupi hlun cu phone in “bank account ah na pasal hlun hrangah paisa a lut. Yangon ah ra aw la paisa kan suah dingih zaangdom ah ting 5 na hlawh ve ding” tiah an ti ṭheu.

LalMuanPuia thuhla hi a thok ihsin ngan ding cun a tam tuk ruangah hizat lawng hi si hrih sehla,… tuvek boruak ah bum tuar lo dingin fimkhur hramhram uh si.

Hminsin : Lalmuanpuia hi Kale township **** khua ih piang a si ih a nauhak lai in a nu le pa an ṭhen aw. Um nak mumal khal nei loin Mizoram hmun hranhran le Yangon lam khal ah a um ṭheu. (Special Report)

Leave a Reply

Your email address will not be published. Required fields are marked *