Ralring : Kalaymyo ah Miphakar, Mizuarthlai hmang an tam

Kalaymyo, Nyaung Pin Thar veng ih vengbawi hlun U Za Duh Lian cu April 21 ah a relhnak hmun ah ralkap kaihkhih a tuar.

Ralkap kaihkhih a tuar dan zoh ciang a si tikah ralkap thuthup pe ringringtu mipi lakah an um ciang tiah ruah a si. Anih hi ralkap ukhruainak duhlo ah hnaṭuan bansan a si ih kaihkhih phang ah mi inn ah a relh.

Kaihkhih a tuar thu thawn pehparin veng sung um mipakhat cun “zaanlam nazi 3 hrawng ah an kai mi a si. A umnak inn an pan ih a rak um lo. Cuhnu ah a relhnak inn ah an va kai. A relhnak inn ziangtin an thei ti cu kan thei ve lo” a ti.

April 20 khalah Kalaymyo, Sanmyo veng ih mino 4 cu an umnak inn theifel ciangzet bangin SAC ralkap le palik in an va kai. Hikhalhi ralkap lam thuthup petu an um ruangah kaih an tuar mi a si tiah ruahnak a um.

Hitiih kan mino, khuatlang upa a lak ih kaihkhih an tuar ai cun hriamhreikeng tlangpar ralkapbu ah lut sehla Dothlennak hrang hmasawnnak a um sawn ding tiah ruahnak a um ih hminthup mipakhat cun “ralkap kaihkhihtuar miṭhenkhat cu an ruak lamlam ralkap/palik kut ta va tlan a ṭul ṭheu. Miṭhen an si le hawi bang thei nawn lo ding tiang kutthlak hremnak an tuar. Cuvek a si tikah ralkap kut tuar in kan san a vavai ai cun hriamhreikeng tlangpar ralkapbu ah kop sehla kan lam a tluang sawn ding.”

“Cun, tlangpar hriamhreikeng ralkapbu kan kop theilo ding ceng a si cun kan mi le sa ralkap kut ih thlengtertu miphakar mizuarthlai hmang pawl hi hmuhsuak tum in kan thianfai tengteng a ṭul a si”
tiah a hmuhdan a relsuak a si.

Leave a Reply

Your email address will not be published. Required fields are marked *