Ralkap pawl ih tuah mawh mi Chinpa cu Siizung ah besia in a um

Kalaymyo SaiKhua ih um Pa Thang Khan Lian le Pi Kap Zun Tial tei` fapa Salai Mang Lam Tuang (kum 14) cu March 21, tlai lam ah khan a rual le pawl thawn Setmuhzon(စက်မူဇုန်)ihsin an khua Saikhua lam pan in an tlung lai ah dunglam ihsin ralkap mawtaw in a pah ih Salai Mang Lam Tuang le a rual pawl cun ralkap pawl an hmuh tik ah an tih tuk ih an tlan.

An tlan lai ah dunglam ihsin meithal in an kap ih Salai Mang Lam Tuang ih zaang ah an kap ngah asi. cutin naa le ṭih cingin a tlan ih ralkap pawl in a dung in an dawi ih nasa zet in an thawi hnu ah ralkap sizungah an ret.

A zaan ah ralkap pawl in Tahan uktu hnenah phone call in thuhla an sim thei ih cutin Salai Mang Lam Tuang thuhla cu theihsuahfang a si. A nu hman in a thaizing lawngah a fapa cungcang a thei lai.

Thuhla an thei veten an ngaihven lohli ih Salai Mang Lam Tuang cu an va hmusuak. A zaang ih an kah nak cu an rak ṭhitsak zo nan a awng tete hmuh ding a um. A hnakruh pakhat a siatsuah ngah ih a kut le ke pawl tla kiak in a besia zet. Tham khal a siang lo.

Siizung ah ni 45 sung a um ṭul lai tiah ralkap pawl in an sim. Anu in a Hliam awk nak pawl a zuk cu ralkap pawl in an delete ter sal hlei ah a phone khal an lawng cih.

Ralkap lam cun kan mawtaw a pah ruangah tuvek dinhmun a thleng hi a si tiah Salai Mang Lam Tuang riangri sual an puh ih a sungte hnen ah an sim. (Lawrkhawm)

Leave a Reply

Your email address will not be published. Required fields are marked *