Ralkap kut hnuai ah Falam Volunteers a cangvai thei tum nawn lo

Covid 19 lak ihsin Falam khuapi kilhim enkoltu Falam Volunteer cun teimak suahin ṭan alak ṭheumi Lungpi FQ kilkhawi le Sun Ceu khan luan ih duty ṭuanvo a la ṭheu mi cu ṭuanpehzom a tum nawn lo tiah theih a si.

Hih thuthawn pehparin Falam Volunteers hotu Salai Timmy cun “Kan rampi Covid 19 a thleng veten Falam Volunteer tin kan upa pawl hruainak in kan din ih tuni tiang thla 10 lai Falam Mino pawl ṭanrualnak in kan feh!

“Covid 19 Positive 30 zik, FQ um ramdang tlung 800 luan le ramsung tlung 900 luan cu kanmah titheitawk ten kan kilkhawi. Harsatnak tampi a um nan kan ṭuan ṭento. Ziangahtile kan ṭuanmi hi Pathian hrang le kan mipi hrang a si ti`n kan ruat.”

“Nan, tuahcun Ralkap nih rampi uknak an lak tikah cun kan nih Falam Volunteers in Falam FQ thu le Q thu ah zianghman ṭuanvo lak ding thazaang kan nei nawn lo. Tuzan tla Falam ah Covid 19 positive 2 an um bet, nehhnu khalah an um sinsin lai ding.”

“Sunceu Gate ah le Lungpi FQ thu ah zianghman thupeknak suakmi a um nawn lo! Curuangah kan nih Falam Volunteers cun kan ti thei tawk in kan ṭuan zo ih ralkap nih rampi thu ah ṭuanvo a lak zo ruangah tuzan ihsin thok, Falam Volunteers nih FQ thu ziang hman ṭuanvo kan lak nawn lo” a ti.

Myanmar ralkap cun February 1 zing ah rampi thuneihnak a laak ih ramsung ukawdan a thleng kual thluh. Cumi ruangah NLD cozah thawn lungrual zetih hna rak ṭuan dahtu ramkulh, pengṭhen ih pawlkom tete cu an vavai thluh a si.

Cuvek dinhmun a si ruangah Falam Volunteers cun teimak suah in Falam a kilhim ṭheumi cu ṭuan pehzomnak thazaang a nei nawn lo a si.

Leave a Reply

Your email address will not be published. Required fields are marked *