Ralkap cozah siseh, Mipi lam khal Dungsip Theih a si nawn lo – Saya James Thang

Kawlram Independent ngah a si hnu 2021 ih Ralkap Aana ting hi 1962,1988 thawn a veithumnak a si thlang. 1962 kum ihsin tuini tiang Ralkappawl cu Mipi humhimtu sisawn lo in Mipi kap thattu le hremtu le Rampi ṭhangsoloding ih tuahtu an si tisehla a sual lo ding. Hitivek ih Ralkap Aana a ting ṭheunak a san cu an mah Ralkap lawng hin Rampi uktu Aanasin si a duh ringring ruang ah a si tin BBC news cun a puang.

1962 kum ih Ralkap Aana a ting naksan cu Ramsungah Karen tapung le Burma Communist Tapung ral a tho hlei ah Wunkyikyuk U Nu in Buddhist biaknak cu Rampi biaknak ah a tuah. Tlangparmi lungawilo cun sandah an piah ih Ramsung buainak a suak. Cumi laite ah Ralkap cun khaamtlang ih tlakzik mi Rampi ka run tin puhmawh in Aana a ting.

1988 khal, Cozah duhlo Mipi Sandahpiah a suak ih Ramsung ah Uktu umlo(မင်းမဲ့စရိုက်) vekin that awnak le buainak a suak ih Rampi a kilikip in a siat thluh ruangah ka run tiah puhmawh nei in Ralkap cun Aana a ting ih Martial Law (စစ်အုပ်ချုပ်ရေး) puang in Mipi sandahpiahpawl cu a kap, a kai a hrem ih thawng a thlak hlei ah Curfew suah in cang theiloding in Mioi cu a tuah.

Cuti ih awlai ten Martial law puang ih Aana a ting theinak khal Ralkap cun Ramsung thubuai vekin puhmawh ding (အကြောင်းပြချက်) ṭhazet a nei ruangah a si ih UN le US lam khalcun an buaipi theilo. 1962 le 1988 ih Aanating ziangkim controltubik cu Bogyokkyi Ne Win a si veve.

2021 Ralkap Aana ting cu Ramsung buainak puhmawh ding zianghman um lo, Election vote thlak a dik lo tilawng puhmawh nei inle Aana duhtuk ruangih diklo zetih Aanatingmi a si ruang ah International law pahbal a si ih UN ,US le EU cun an ngai poimawh zet ih an zoh liam menlo ding ticu a fiang.

Ralbawi hrekkhat tlacu Sanction tuahin US le UK cun action a la cih. UN, GS khal cun “Tuisan ah Aanating pawl hrang umnak hmun a um nawn” lo tiah a sim ih UN lamin napin Action lak an tum thu a puang ve. UN Security Council le UN Human Right Council khal poimawh(emergency) Meeting ko in Kawlram thu an rel ih Ralkappawl ih an Kaimi Pi Suhkyi tel in an zaten thlah lohli ding ah zate lungkim in ca an suah (Ralkap a bawmtu China le Rusia cu an kaimi suah thluh ding ah an lungkimpi ve nan Aana ting an si lo 2008 daan hrampivek in aana an kilkhawi mi a si tiah an ṭanpi).

US President khalcun Ralkap ih Aana tingmi cu pompi lo in Mipi hriltling Cozah hnen Aana pek kirsal dingah le an kaihmi zaten thlahsal lohli ding ah a forh. CNN news cun “Democracy daan vekih Mipi hriltlingmi Cozah cu Ralkap in daanlo ih Aana a ting mai hi US President Joe Biden ih Democracy ka kil him ding tiah vote hawl lai ih a thukam cu a challenge vek a bang” tiah a sim.

US Rampi Hlutdaw khal cun Democracy daan ih hriltlinmi Cozah Aana a ngah salnakding le Ralkap ih a kaimi zaten luatnakding hrang a ṭuldaan vek ih Aana ting Ralkap tlun ah action lak theiding in president cu ṭuanvo ziangkim a pek zo. China le Russia khal cun Ramsung buai nak a si ruangah Daan sungin pakhat le pakhat rem daihnak reltlang ding a ṭhat thu le Ralkap pawl ih an kaihmi Pi Suhkyi le President telin kaihmi zaten suah lohli ding thu an sim veve. Ramsung khal in NLD MP tamsawn le Tlangparmi paty MP mallai kopaw cun Committee Representing Pyidaungsu Hlutdaw ( CRPH ) ပြည်ထောင်စုလွှတ်တော်ကိုယ်စားပြုကော်မတီ din in Dr Sa Sa cu UN palai ah ṭuan terin ṭan napin lak an tum.

Ralkap lam ihsin Rampi buainak ruangah lohtheilo ih Aanating a si thu puhmawh ding(အကြောင်းပြချက်) ṭhazet a nei lo a sile UN le US cun a ṭul daan vekih action lak ding ah an ready cia. “Tuvek caan ih Action laklo a si le Democracy ram Cozah pawlcu hriamhrei nei Ralkap pawlin an duhduh tikah Aana an tingding ti phan a um ih Kawlram thubuai hi Kawlram lawng silo in leitlun Democracy ram zate ih Security tiang khawihban mi thubuai a si” ti ah US cun a sim.

Ralkap lamcun UN le US ih action lak tonglo dingin a titheitawk suakin puhmawh ding pakhatkhat cu a hawl rori a ttul. Theicia zo bangin a hmaisabik ah thawngtlak pawl a thlahih buainak a tuah nan a hlawhtlinglo. Tu ah a mah dinpitu (ထောက်ခံသူ) Mihrek khat hmangin Mipi lak ah buainak tuah le Sandahpiahpawl sung lungrual lo dingih buainak tuah le Internet Line phitsak tivek pawl hi a tuah lai dingmi le a tuah rero laimipawl a si.

Mihrek nih 1988 lai vekin tirupro le cian zetih Sandahpiahpawl cu olten a bal (ဖြိုခွဲ) mai ding an zum nan 2021 ah cuvek a theih nawnlo. IT san a si ih Media le information a cak tuk zo. Daan lo ih 1988 vekin a cangvai a si ahcun Leitlun ram hmuahhmuah in a coplecilh in an thei cih dingih UN le US Ralkappawl cun an zoh men lo ding ticu theih a si.

VOA news nih Kawlram Sandahpiahpawl ih cangvaidaan Satellite ih a zukmi a tarlang cun US President ih leitlun in kanlo thlir ringring a timi cu sullam a nei zet . Ralkap khalcun sandahpiahpawl tlun ih a cangvai daan cu leitlun in inthlir rinring ti a thei ih sandahpiahpawl khal Ralkappawl hmang lo in daan vekih Palik lawng hmangin a khamnak san a si.(Palik lak ah palik uniform hruk ralkap tampi an tel)

Kawlram sungah Sandahpiah hmuahhmuah lak ah 2021 sandahpiah tluk ih Mipi lungrual a umdahlo ding tiah a teltu a thlirtu zocio khal cun an ti ṭheh. Sandahpiah ih a teltupawl hi Generation X,Y,Z tiin ṭhenthum ah ṭhen in sanman zetin an cangvai.

Generation GX (Min Ko Naing) pawlcu ruahnak pekih telpitu an si ih GY (Cozah hnaṭuan le Pacang no) pawl le GZ (tlawngta mino) pawl cu phurzet le lungrual thatho zet ih CDM le zinpar ah suakin sikaan (စည်းကမ်း) nei zetih nitin sandahpiah tu an si. Sandah piah ṭheh zinpar ah hnawmhne hmuh ding a um lo. GZ pawl in IT thiamnak hmangin tactic a phunphun suahin le mah le group ciar ṭuanvo lak kilkhawi awin an cangvaimi hmuh tikah tha a tho duh nasa. 1988 Sandahpiah lai thawn a dangaw verver. Kan GZ pawl an fim an fel nasa.

Ralkap lamin dungsip thei an si nawnlo vekin Mipi lam khal dung sip thei a si nawnlo. Ralkap lamcun an titheitawk a neihmi tactic le hriamhrei hmangin Mipi ṭih dingin a phunphun in a hro dingih a cangvai ding vekin Mipi lam khal cun Pathian rinsan inle ṭihlo in kan fim kan thiamnak suah inle Lungrual thinsau Beidonglo in nehlaihlanlo theihpatawk ih ṭan lak a ṭul ve. Pathian kan lam ah a ṭang ih Mipi cun nehnak kan co tengteng ding.

James Thang (Generation X)
source: CNN,VOA, BBC, RFA

Leave a Reply

Your email address will not be published. Required fields are marked *