Ralhraang SAC ralkap in Ramthlo khua Urkaang

Hakha ihsin Falam lam pantu ralhraang SAC ralkap cun tuni May 4 ah Falam peng, Ramthlo khua ih inn pawl an urkaang tiah theih a si.

Inn ziangzat a kaang zo ti cu felfai in theih a si lo ih, sun hrawng tiangah hmunhla ihsin a lang dan ah inn 10 hrawng a kaang zo ding zum a um ti`n khawmi pawl in an sim.

Ralhraang ralkap hi thazaang 100 hrawng an si ding zum a si ih May 2 ah Hakha ihsin Falam lam pan in an poksuak.

Zintluan ah mipi ralkap in an rak do vivo ih, tuzing khalah Dokthek le Ramthlo khua karlak ah kapawknak a um tiah Khawmi pawl cun an sim.

Ralhraang ralkap hi an vah sukso nakah mithat innkhaang an hmang ruangah Falam-Hakha zin thawn nai deuh ih um khawmi pawl cu sahimnak hawlin hramlak ah an rak beu cia tiah theih a si. (Zuk : CungNgai)

Falam-Hakha zinpi doawknak ah SAC ralhraang tuar na, mithi an tam

Siarbet : Falam-Hakha zinpi doawknak ah SAC ralhraang tuar na, mithi an tam (May 3)

2022, May 3 zaanlam nazi 4 hrawngah Hakha ihsin Falam lam pantu ralhraang SAC ralkap mawṭawtlar cu lamlak ihsin CDF Hakha ralkap pawl in an rak kap ih ralhraang 13 hrawng an thi ding tiah ruah a si.

An kap nak hmun hi Chuncung le Dokthek karlak hrawngah a si ih ruah sur laifang an pung khawm lai ah kan kap ti`n CDF Hakha hnen ihsin thuthang theih a si.

“Hmunkhat ah an um lai ah kan kap. 40MM le hmunhla kahnak Sniper deuh kan hmang. Mibur an umnak khalah bomb kan thlak. Minung 13 hnak ih mallo an thi ding” tiah CDF Hakha hnen ihsin thuthang a suak mi cu The Hakha Post in a tarlang.

Ralhraang lam hi ralkap thazaang 100 hrawng an si ding zum a si ih, raldonak mawṭaw 2 telin mawṭaw 20 hrawng thawn an si.

Ramsung thuthang ṭhenkhat le CNA thawn naivaitu bulpak miṭhenkhat cun ralhraang pawl hin CDF kaihngahmi rakap 8 le thawngtlak 20 hrawng an phur cih tiah an sim ih, cuvek dinhmun a si ruangah mipi ralkap pawl in duh vekin an kap ngam lo ti a si.

Ralhraang SAC ralkap mawṭawtlar cu Hakha ihsin May 2 ah an poksuak ih, cuih ni thotho ah Hakha le Chuncung karlak an thlen ah CDF pawl in an rak kap ih ralhraang 3 an thi tiah theih a si.

Hakha le Falam cu nazikaar feh lawng a si nan ralhraang pawl an feh tikah kahdonak a suak ṭheu ih lamtluan ah zarhkhat hrawng an rei ṭheu a si.

Leave a Reply

Your email address will not be published. Required fields are marked *