Ralhraang SAC ralkap in Falam peng ah Khua pumhlum deuh thaw Inn boh in thil fir

Falam peng, Valung khua ih zaankhat caamlawktu ralhraang SAC ralkap pawl cun khawsung inn zate deuh thaw an boh ih thilri phunphun an fir.

Ralhraang pawl cu Kawlrawn ihsin Falam lam pan in kan dung kaar ah an kaiso ih, Kalay lam pan ih an kir saal lam ah Lamtluan rorin thilri fir in an khawsa.

February 14 ah Valung khua ah lutin zaankhat an caam. Cuih tikcucaan sungah khawsung inn zate deuh thaw an boh mi a si ih, thil phunphun an fir hlei ah khawmi pawl ih neihsun ṭilva that sakin zu le sa an ceen.

“An rat ding thu kan thei cia ruangah khawmi zaten khua kan suah san. Zaankhat an caam sungah khawsung innkhi ṭhen 3 ih ṭhen 2 hrawng an boh. Kalay ihsin an kaiso lam khalah inn ṭhenkhat an boh. Tuṭum cu an boh tam ih biakinn sung thilri khal an fir cih, tuizing khawvang hnu ah khua an suah san” tiah khawmi pakhat cun a rel.

Ralhraang pawl cun Falam ihsin Kalay lam an pan phah ah Hlan Zawl khawmi pawl ih khawtlang ṭhansonak hrang Mya Sein Yaung (မြစိမ်းရောင်စီမံကိန်း) paisa puuk mi kyat ting 160 an fir sak cih tiah CNO/CNDF in tuini February 15 ah thu an suah a si.

Falam : SAC ralhraang in Khawmi Inn, Lo, Neihsiah siatsak hlei ah Kyat Tingteel fir bet

Siarbet : SAC ralhraang in Khawmi Inn, Lo, Neihsiah siatsak hlei ah Kyat Tingteel fir bet

Kawlrawn ihsin Falam tatkung hrang ei-inn phurtu SAC ralhraang pawl cun an feh sukso nakah khawmi Inn le Lo an siat sak hlei ah rannung ṭilva fir sakin khawtlang ṭhansonak hrang paisa puukmi tivek tiang an fir sak tiah theih a si.

“Ralhraang cun Hlan Zawl khawmi pawl ih khawtlang ṭhansonak hrang Mya Sein Yaung (မြစိမ်းရောင်စီမံကိန်း) paisa puuk mi kyat ting 160 an fir sak.”

“Lamziintluan ah khawmi thilri siat sak in, rannung ṭilva an fir sak hlei ah ထင်းရှူး sakhan kiangih ngakaan tivek tiang an siat sak” tiah CNO/CNDF in tuini February 15 ah thu an suah.

Falam tatkung hrang ei-in phurtu Ralhraang mawṭaw 22 hrawng cu kan dung zarh ah Falam pan in an kaiso ih lamziin thianfai dingin hmainortu miṭhenkhat an thlah hmasa.

Cupawlcu Parte khua kiangah CNDF ralkap pawl in an rak ciilnuai ih ralhraanglam mithi 5 an an um hlei ah hriam tuar tamzet an um tiah theih a si.

Falam ihsin an kir lam khalah CNDF bomb kam mi 20 hrawng an ti puak ih mithi 3 hrawng an um thei ti`n February 15, CNO/CNDF thusuah ah an ngan tel a si.

Leave a Reply

Your email address will not be published. Required fields are marked *