Ralhraang ralkap in Chin Tlawngta nauhak 2 kap that

Thlanglam Laitlang, Paletwa ah ralhraang ralkap in Tlawngta nauhak pawl to mi ceet lawng an kap ruangah nauhak 2 thi in hriam tuar 3 an um.

Tu ni, August 2 ah Paletwa, Tonemawa hramthok Tlawng ihsin ceet Lawng thawn khua lam pan in an tlung lai fangah ralhraang ralkap pawl in an kap mi a si ih kum 12 mi, phun 5 kai lai Thlawngta nauhak 2 an thi tiah theih a si.

Ralhraang kah that mi nauhak pahnih cu Rimawa khawmi Mg Nay Min Htun le Mg Aung Than Myat te pahnih an si ih, kum 12 hrawngmi si in phun 5 kai lai an si.

“Kum 54 mi mipakhat le phun 5 kai lai nunau le mipa khal an kap ngah. Nauhak pahnih cu dunglam le an Ke pawl ah kah ngah an si ih kum upalam pakhat cu a kut le a hna ah an kap ngah” tiah khawmi pakhat in a rel.

Ceet Lawng totu hi Tlawngta nauhak amalbik mi 10 hrawng an si ih hriam tuar 3 pawl cu zaan nazi 7 hrawngah Paletwa siizung ah an thleng tiah amahcun a rel bet hrih.

Tufang hi Paletwa ah ralhraang ralkap le AA ralkap karlak boruak a sosang ih mizaan August 1 khalah kahdonak a um tiah thuthang kan thei.

Leave a Reply

Your email address will not be published. Required fields are marked *