Ralhraang ralkap in Ṭaal khua Urkaang, Chin ralkap thawn do aw

Falam-Hakha lamziinpi ih um Ṭaal khua cu tuni July 9 ah ralhraang ralkap pawl in an urkaang ih inn tam zet a kaang.

Zinglam nazi 11 hrawng ah an urkaang tiah thuthang theih a si ih inn ziangzat ciah a kaang ti cu cipciar in theih fiang a si hrih lo.

Mipi ralkap CNDF, CDF, CNA le ralhraang ralkap kahdonak khal a um ti`n thuthang kan thei ih ralhraang lam ah mithi um in hriam tuar tla an um.

Mizaan July 8 khal ah Chin ralkap le ralhraang pawl an kapaw ih ralhraang lam ah mithi tam in a hmun ah miruak pawl an urkaang cih tiah thuthang kan thei.

Tuni, Ṭaal khua an urkaang mi thu thawn pehparin “hmun hla lawng in kan hmu. Ziinpikap ih inn pawl a kaang, Biakinn kiangkap inn pawl khal a kaang. Khawmi zate cu ralhraang ralkap hilam an ra ti kan thei veten hramlak ah kan tlan” tiah tualsungum khawmi pakhat in a rel.

Ṭaal khua hi ralhraang ralkap in kan dung kum, kum cem lam ah ṭum 2 an rak urkaang zo ih cuih ṭum ah inn 11 hrawng a kaang zo.

Innkhi 30 luan fang um mi Ṭaal khua ah ralhraang ralkap pawl an riak ih khawmi inn boh sakin thilri phunphun an fir hlei ah rannung pawl that sakin khawsung ah nuum an ceen.

Biakinn sungah nuum ceen in Pathian biaknak an ti borhbah ruangah Falam peng biaknaklam hruaitu le Ṭaal khawmi pawl tongkhawmaw in sathi luannak thawn Pathian hnen ah biakinn an ap saal dah zo a si.

Leave a Reply

Your email address will not be published. Required fields are marked *