R.I.P. : Paralṭha Salai Than Sang mual liam

April 1, AungChianTha doawknak ih meithal hliamtuar Paralṭha Salai Than Sang cu April 3 zinglam nazi 2 hrawng ah a nat tuar lo in a nunnak a cem tiah thei a si.

Kalaymyo seh vel ah meithal hriamhrei hmangin Kawl ralkap hraang le mipi doawknak cu March thlacem in an thok ih mipi lam khal siseh, ralkap lam khal mithi hnih thum an um.

April 1, zinglam nazi 9 hrawng ih AungChianTha khua kahawknak ah ralkap pawl in Salai Than Sang pum ah an kap ngah ih hliamtuar besia in a um.

“Hliamtuar besia a si tikah Siizung hmanrua ṭha thawn zoh ciang ṭul dinhmun a si. Hmaisa ahcun Natchaung siizung ah tuamhlawm a siih x-ray lak ṭul a si tikah hmundang pan ṭul dinhmun a si.”

“Natchaung lamah kahawknak a um pehzom tikah hmunhim ah an relh lawk. Cuhnu ah hmun dangah fehpi a si ih nazi 9 hrawngah Operation an ṭheh ih April 3 zinglam nazi 2 hrawng ah a nat tuar loin a nunnak a cem” tiah thuhla theiciangtu pawl in an sim.

Aruak cu **** mino pawl in an thlah ih Hakhalay mino pawl khalin an rak hmuak tiah theih a si. Amah hi Kalaymyo, Tanbu khua mi a si ih Physics in degree ngahzotu a si.

Paralṭha Salai Than Sang ih ruak cu thaisun lam ah an vui tum tiah theih a si ih ram hrang ah a nunnak a liam ah hin kum 26 telawng a si lai. (Chinlung Today)

Leave a Reply

Your email address will not be published. Required fields are marked *