Pukmah 505 thawn heektuar Falam mino 3 cu Thuṭhenzung ah suahpi an si

Duhphorh lamzawh ṭiak zik, thlacamnak nei tum fangih kaihkhihtuar Falam mino 3 cu palik lam in pukmah 505 thawn an heek tiah theih a si ih thuhla sutnak felfai nei dingin March 1 zaanlam 3 hrawngah Falam thuțhenzung ah an suahpi tiah theih a si.

Kaihkhih tuar Salai Bawi Hlei Cuang, Pa Kyaw Kyaw le Pa Za Lian te pawl cu February 28 ih ralkap uknak dodal duhphorhnak ih telvetu an si ih lamzawh ṭiak thlacam ding i mipi an hngakawk lai ah palik lam in mitthlitlak bomb thawn an kap hnu ih kaihkhihtuar an si.

Falam Thuṭhenzung ih suahpi an si thu thawn pehpar in thuțhenzung bawi U Soe Lin Naing cun, “tuni cu thusutnak le thuhla simfiangnak men lawng a si. March 4 ah milai pianvo vekin shih-ne hlaang theinak an nei. Atu ahcu pukmah 505 in an khiing ih hmaizarh ah ziangmi pukmah in thuțhenzung in kan cohlaang ding timi le hih case ziangtluk a rei ding ti cu cutik lawngah a fiang lai ding” tiah Chinland Herald Daily news hnen ah asim.

Mizaan ih kaihkhih tuar mino 3 cu an kai hnu reilote ah vankau ralkap umnak lam ah an hruaiso ih, cuih hmun i an zohkhen dan thuthawn pehpar in “thlanglam palik thawnginn ih um hnakin ralkap camp ah kan um remcang sawn. Hremnak le hronak zianghman a um lo” tiah Mino 3 cun CH hnen ah an sim.

Thuṭhenzung i an suahpi ah hin kaihtuar pawl i sungkhat unau le Pastor ṭhenkhat khalin an telpi thei tiah theih a si ih zung sungih thusutnak an nei hnu ah palik in an hruaiso sal tiah theih a si.

zuk:CH daily news

Leave a Reply

Your email address will not be published. Required fields are marked *