Pu Terence San Mawi Nikhuai thuanthutawi le Sinak thar a ngah hnu Annka

Kum 2021, February 1 ih Myanmar rampi thuneihnak cuhtu Myanamr ralkap cun cozah thar dinin rampi ukawkdan a thleng cih.

Cumi ah NLD cozah san ih Chinram hruaitu NLD cozah khal hnolin Chin State Administration Council timi Chinram uknak kaihruaituding cozah thar a din tiah theih a si.

Tuhirh tiang cu ralkap cozah in Chin State Administration Council sungtel ah zopawl hnaṭuan a pek ding ti a phuang hrih lo nan siibawi hminthang Dr. Ni Khuai ih fapa Pu Terence San Mawi Nikhuai cu Chin State Administative Chairman ah a ret a si.

Pu Terence San Mawi Nikhuai hi mipi` neel zetmi a si lo ih a thuhla hmuhding a um cuca lo. Amah thuthawn pehpar in a unau sungkhat a simi Pu Michael Ngun Lal cun “Terrance thawn hi pa khat nu dang, unau kan si. Ka pa in ka nu thawn an ṭhenaw hnu England ah nupi a nei le a remcang maw ti’n ka pu (ka nu ih pa) hnenah thu a ron ih ka pu ih siannak thawn England mi Jasmine thawn an ṭhit awk. Jasmine thawn fate 9 an nei ih Terrance hi upabik a si” a ti.

Dr. Ni Khuai fapa upabik Pu Terence San Mawi cun unau 8 a nei tiah theih a siih a unau pawl cu Jacquiline Saw Vang (Yangon), Steven Thnag Luai (Tleicia), Jessi Hlai Man (Yangon), Timmy Phun Lian Thang (England), Andrew Lian Sang (England), Mary Anna Bawi Thiam (Yangon), Jeanie Cung Khim (England) le Jonathan Sui Lian Sang (England) pawl tla an si.

Falam Siizungpi ih hnaṭuan Dr. Ni Khuai heek a tuar ruangah Mandalay, Yamethin le Meikṭhila pawl ah ṭhawn in hna a ṭuan ih Pu Terrance tei unauza khal cun a pai’ ṭhawnak hmun ah an thlun vingvo. Cuti’n Meikṭhila khuami thawn an ṭhit awk ih fanu pakhat le fapa pakhat an nei.

Biaknak bangaw lo ruangah innsang remcang loin a dangdang in an um tiah theih a si. Kum 65 a si thlangmi Pu Terrance San Mawi Nikhuai cu Falam ah hramthok tlawng a kai ih Meiṭhila ihsin phun 10 a ong hnu Yangon phunsang tlawng ihsin Daan thu degree ngahtu a si. Tlawng a ṭheh hnu in thuṭhenzung ah hnaṭuan a thok ih Yangon, Mandalay, Shan ram le Falam pawl ah aum tiah theih a si.

NLD cozah san ah Chinram Chief of Justice dinhmun in cozah hnaṭuan a si ih a tu dinhmun thar a ngah mi thuthawn pehpar in “Thuhnokbuai lai ah ṭuanvo pek ka siih ziangti’n a si ding timi tla ka thei ve hrih lo. Asinan, ram le miphun hrangah ti thei tawk thazang suah in ka ṭuan ko ding. Nan zapi ih ṭan le bawmnak ka ṭul tuk” a ti.

Hram : Chinland Herald Daily News

Leave a Reply

Your email address will not be published. Required fields are marked *