Pu No Than Kap simfiahnak le Meeting cazin ngankhummi bawng aw lo

Tuini, May 21 ih Chin online khawvel titi larbik pakhat cu Falam peng ih doawknak thu le UEC meeting ih Pu No Than Kap a feh ve mi thu pawl an si.

Ralkap dinmi Union Election Commission meeting ah CNLD ṭuanvonei Pu No Than Kap a telve mi thuthawn pehpar in “CNLD in a theih pi lo thu, meeting kai lo dingin Pu No Than Kap ca an kuat thu le zingzoinak nei in FB cahmai lam ah thuhla felfai simthannak an nei leh ding thu” CNLD chairman Pu Ngai Sak in a rel.

Cumi thu ah CNLD ṭuanvonei Pu No Than Kap cun simfiahnak a nei ve ih “CNLD ihsin keimah bulpak cun March 31, 2021 ah ka cawl zo na’n tulai boruak thawn EC in ka “suahnak ca” an hmukim loih party sungtel vekah in ruat hrih. Tulai buai thawn party sung thu hi lenglam ah post rero a ṭha lo ding ti ruat ruangah tuhlan ah ka post lonak a si. Tusun ah CNLD aiawh in UEC meeting ka kai lo. Hnaṭuan thudang thawn Naypyidaw ka thlen laifang a si ruangah ṭuanpi rualpi pawl ka va cibai phah men mi a sawn a si” tiah bulpak FB cahmai ah simfiahnak a nei ih March 30 ni khenmi party suahdilnak ca khal a tarlang cih.

Asinan, UEC meeting kaitu rampumhuap ramkhel party 59 cazin ah CNLD party hmin ngan khum in a um ve tikah Chin mipi an buai zet.

Cumicu thulengvak men siloin rinsantlak ramsung media ṭhenkhat in an tarlangmi a si tikah mipi thinlung a ti hring sinsin.

Asinan, ramsung boruak thlirtu mipakhat cun “Fact check ta loin an ngan mi siding zum a um. Rinsantlak meidia pakhat in May 21 UEC meeting ih tellotu cazin a tuah mi ah CNLD khal an tel ve. Cuvek a si tikah CNLD aiawh ih va telmi cu a si zik lo. Cun, tonakding hmun tuah sak ding cu meeting sawmtu ṭuanvo a si. A feh le fehlo cu party thuthu sawn a si” a ti ve thung.

Mipi lam khalin meeting kaitu cazin ih CNLD party hmin a lang hnu caan tawkmawi ahcun cangantu lam tisualnak a si ding tiah zumnak neitu an um nan, tuvek kan ram boruak ah SAC ralhraang hnen ih meeting va tel cu thuruat ding tamzet a um ti`n Pu No Than Kap vuihramtu an tam. Chin mipi hrang boruak a hai zik titu khal an um.

Edit : CNLD party aiawh in Pu No Than Kap a tel mi si lo tiah CNLD in official in tlangthannak an nei.

Leave a Reply

Your email address will not be published. Required fields are marked *