Pu No Than Kap relmi “DOLETNAK UMZIA”

A tlangpithu in Doletnak phun 2 a um:
1. Thahrum suah lole hriamhreikai doletnak (violent or armed revolution ) le, 2. A nemzawng doletnak (non violent revolution).

Hman thiam danih zirin an 2 in hmual an nei veve.

1. Hriamhrei thawn doletnak (Armed revolution)

Myanmar ah Tatmadaw dintu Gen Aungsan ho in Mirang doletnak an rak tuah laiah, a nemzawng (non-violence) si loin hriamhreikai (armed revolution) tuahin an rak dolet. An hlawhtling ih Myanmar in Independence a ngah.

Hivekin Hriamhreikai doletnak a hlawhtlin ruangih a rahsuah cu, Tuini tiangin Ramthu ah, hriamhreikai lawng uktu le laireltu an si thei, mai duhmi le tumtahmi khal an ngah thei ti mi ruahnak mi tampi thinlung ah a um lanta.

Hivek ruahnak a um lanta rak phang zettu cu 1935 ih Myanmar Prime Minister (PM) hmaisabik Dr. Ba Maw a si. Bama ram ah ṭhangthar minopawl in hriamhrei kaih ih doletnak tuah an uar tuk zo, dan vekah a can lanta ka phang, a rak ti dah.

A rak phan cia bangin, Independence ngah hnu thla 3 rei ihsin tuini tiang Myanmar ramsung hmunkip ah ramthu laireltu le mipi tlunih thuneitu cu hriamkai an si; Doletnak umsun khal hriamhreikaih doletnak lawng a si, tiin ruat phah thluh a si.

Tuini ahcun Rampi hmun kipah, hring dildel le dai nuam riahri Chinram fing le tlang tiangin, ziankhu in a zel ih meithal tintian puak awn a khat thluh thlang!

Zoh rero ah, Myanmar ramsung zate (Chinram tiangin) Hriamhreikaih cu Nunphung (culture) pakhat vekah a cang vivo thlang.

2. Hriamhreikai lo a nemzawng Doletnak (Nonviolent revolution)

A nemzawng doletnak ah, Civil Disobedience Movement (CDM) phunphun,_Lamzin zawh, Rawl ulh (hunger strike), le Thu phunphun ngan, Sumpai thawh, Thurawn pek, Lobby tuah le, ~Non Cooperation Movement (NCM) tipawl an tel.

Gandhi in India Independence ngah tumin Mirang a do (doletnak a tuah) laiah, Aungsan vek si loin a nemzawng (non violence) NCM le CDM – Lamzin zawh le Rawl ulh tipawl a hmang.

Gandhi cun Thahrum suah (violence) a duh lo ruangah,_ CDM tuahin March 12, 1930 ih peng 241 hla lamzin an zawh lai Mirang cozah Palik in nauhak, nunau telin mipi 60,000 luan an thawi, an vuak ciamco ruangah CDM khal a tawpter.

Hriamhreikai ih thahrum suah doletnak hnakin a nemzawng doletnak a hril ih a hlawhtlin ruangah India in August 15,1947 ah Independence a ngah.

Cun, a tlunih ngan mi doletnak phun 2: Violence le non-violence ih tel lo daiten um mipi an umih annih hi an thupi ngaingai.

Mipi cu tidai vek, Doletnak tuahtu cu ngate vek

Tidai cu ngate um loin a nung thei nan, Ngate cu tidai um loin rei a nung thei lo.

Tuini ah, Myanmar Ram ih doletnak ah, Hriamhreikai Doletnak hi phun 2 ah ṭhen theih a si.

1. 2021 hlan ihsin hriamhrei thawn Tlangmi doletnak: Eg., KNLA, KIA, CNA, UWSA, AA,etc.

TUMTAH: Mai miphun zalennak le damnak thupibik ah ret a si. Ukawkdan (political status) thu ah Federal democracy ti a si tlangpi nan cuhnakih sang sawn ngah tum an um, ngah zo khal an um (UWSA).

2. Tatmadaw in 2021 February ih thuneihnak a lak hnuih hriamhrei thawn dolettu: Eg., PDF, CDF, CNDF etc.

TUMTAH: Myanmar rampi Ralkap uknak ihsin luatter ding thupibik ah ret a si. Ukawkdan ding (Political status) cu Federal democracy ti a si.

FIANG LO: Himi hriamkai phun 2 lakah a neta deuh 2021 hnuih hriamkai dolettu lakah phun 2 an um lala,

1. Ralkap doneh (dung an tawlh) a sile doletnak a tawp ding titu (Eg., Bama PDF),

2. Ralkap doneh hmanah Federal Democracy ngah a si cuang lo ahcun do vivo a si ding titu (Eg., Tlangmi Kaya le Chin).

ASINAN, zo bik do vivo a si ding ti a fiang hrih lo. Ralkap cozah um nawn lo hnuah mipi hrilmi Cozah do vivo a si pei maw..???

A tawinak in, 2021 hnulam ih hriamkai doletnak cun Ralkap le an uknak doneh thupibik ah ret a si.
Hiruangah thusutnak ra suak cu, Ralkap in thuneihnak an laksak mi pesal in NLD in Cozah dinsal bangsehla, hriamkai doletnak hi cawlhsan a si pei maw..ti a si.

Leave a Reply

Your email address will not be published. Required fields are marked *