Pu No Than Kap ih Thuken timi Ca suah tu A Phuang Aw

Tulaifang, Chinram huap online ih titi larbik pakhat cu “Pu No Than Kap Ih Hmaisa Bik a Tumtah Mi” timi thulu thawn rialsuah mi caphek thuhla a siih hih thuhla ah simrelnak phunphun a suak.

Cuih ca cu November 5, 2020, CNLD, Falam Neh Co-nak Committee ih suah mi cahmai pali rual ih suah mi sivek in tlangthan a siih mi ṭhenkhat cun party kahawknak ah an rak hmang man.

Ca sung ahcun NLD party sawiselnak, CM Pu Salai Lian Luai thangsiatnak le Chinram sung hnam le miphun, peng khat le peng khat buainak suak ter thei mi catluan khal a tel.

Cuih ca cu online ah a darh vivo ih Hnam le Miphun buainaksuak ter theitu a si ruangah ca suah nak hram hnungzulsal a siih, a mah Pu No Than Kap kan sut tikah kei mah suah mi a si lo a ti.

Hih thu thawn pehpar in CNLD official khal in an mai party suah mi a si lo thu simfiahnak cahmai khat an suah zo.

Amah Pu No Than Kap khal in a mai` ngan mi, a mai thuken a si lo thu bulpak in simfiahnak a nei ih a ngan tu cu Pu Khuang Lian a si tiah a sim.

Thuhla fiangfai suak thei dingin Pu Khuang Lian thusuhnak kan nei tikah kei mai ngan mi a si lo a rak ti lala.

Cutin thuhla a hnok zet lai ah Falam ih um Pu Za Thang cun kei mai suah mi a si tiah a rak phuang.

Pu Za Thang cun, “Kei maih mawh a si. CNLD ih 4.11.2020 ni ih suah mi ca kha keimah`in zohfel ta lo in kan suah pang mi a si ruangah keimaih mawh a si ti zaangfahten ngai thiam ka lo dil” tiah a mai bulpak Facebook cahmai ah a tarlang a si.

Asinan Pu Za Thang cun ziang ruangah a suah, ziang duh san in a suah timi cu simfiahnak a nei lo a si.

Leave a Reply

Your email address will not be published. Required fields are marked *