Pu No Than Kap cu a nunnak hrang tiang phan sak um

Myanmar mipi` Dorallian a simi SAC ralhraang kaihhruainak hnuai ah Pu No Than Kap meeting a kai ve mi thuthawn pehpar in soiseltu le Dalan pakhat vekih hmutu an tam tikah a nunnak hrang tiang phan sak a um ti`n Chinmi lakah thu a leng.

Pu No Than Kap cu CNLD sungtel pakhat si phah cingin UEC meeting ah tello dingih party thusuah ziangah siar loin meeting nakih a va tel thotho mi le mipi` dorallian SAC ralhraang hohami meeting ih a va telmi hin Chin mipi lung a tong lo zet.

SAC ralhraang haihotnak hnuai ih tuahmi UEC meeting a kai mi thu ah “thu kan theih dan vek a si le tuisun ih tuahmi UEC meeting ah Pu No Than Kap a tel ve. Meeting ah tello dingin simthannak kan nei. Ca khal kan kuat. Nan, ziangruangah meeting a va kai thotho ti cu kan thei loih kan mah lam khalin zingzoinak kan nei rero lai” tiah May 21 UEC meeting ih a tel thu thuthang a suak veten CNLD Chairman Pu Ngai Sak in a ṭongsuak.

Meeting kai thu online ih a darh hnu ah amah Pu No Than Kap cun CNLD aiawh in a kai lo thu le March thlacem lam ah CNLD party in suahnak a dil zo thu a tarlang.

Cukhalcu awkam men siloin March 31 ni khenmi CNLD official caphek a tarlang ih party ihsin suahdilnak ca ka theh lut nan remcanlonak ruangah zung lam in an hmu hrih lomi a si a ti.

Meeting kai thu khalah “Hnaṭuan thudang thawn Naypyidaw ka thlen laifang a si ruangah ṭuanpi rualpi pawl ka va cibai phah men mi sawn a si” a ti.

Pu No Than kap cun cutin simfiahnak a nei nan rampihuap hminthang BBC tiangin meeting a kaimi thu pholangnak a nei tikah SAC ralhraang huatnakih ciahkhatmi mipi tamzet lung tong loin a nunnak hrang tiang phan sak a um tiah Chinmi lakah thu a leng a si.

Leave a Reply

Your email address will not be published. Required fields are marked *