Pu Mang Lian in raltlan hrang paisa kuat mi ka ei ruk lo a ti

Mindat raltlan hrang kyat ting 2000 lenglo eiruktu tiih puh mi Pu Mang Lian in internet cahmai ih ka thuhla darhmi cu thuthang dik lo a si ti`n a rel ih paisa ka ei-ruk hrimhrim lo a ti.

Mizaan, June 1 ah ramsung media ṭhenkhat in Aizawl ih um Pu Mang Lian in Mindat raltlan hrang thawhkhawmmi Rs 96.5 lakh (kyat ting 2000) lenglo a ei-ruk ti`n thuthang an suah ih, cumi thu ah amah Pu Mang Lian in simfiahnak a nei ve.

Amahcun “2021, march thla ah NLD palaihlun ဉီးအောင်းသန်း Aizawl ah a thleng ih ramdang ihsin paisa don ding a um thu in sim. Ralthuam leinak hawlpi ding khalin bawmnak in dil.”

“Kei khalin ram le miphun hrang a si tikah thei tawk suah ih bawm ve dingin ka inn ah ka thlengter. Mindat bawmnakding paisa siseh, NUG bawmnak tivek khal cohlangin paisa kan suah. Tlawmngai in hna ka ṭuanpi”.

“Paisa ngahmi sung ihsin ralthuam leinak ding ah ဉီးအောင်းသန်း, ဉီးနေလင်းအောင် le ဉီးငိုင်တမ်မောင်း theihpit lungkimnak thawn paisa 12,000,000 cu kan pe cia sung. Cu hnu ah 65,402 a tang” a ti.

Cumi paisa tang mi cu zoi` kut ah a um ti a rel lo nan “ဉီးအောင်သန်း cu Delhi ah a thleng zo ti`n ka thei. Phone thawn ka call ṭheu nan ka pehtlaih thei lo. Kei mah hi Aizawl khawsung ih um ka si ih khawi hman ah tlanin ka relh lo” tiah amahcun a rel bet hrih ih “thuhla felfai thei duh lole fiangfailo nan um a si le 916009749097 ah in pehtlaih thei” a ti.

Hivek buainak lole bumawknak hi hnam dangdang khalin an tong 2-3 zo ruangah hmailam ah kan ralring thiam a ṭul zet ti`n hmuhtonnak neizotu pawl in an rel.

Original Post (1 June) : Mindat raltlan bawmnakding kyat ting 2000 lenglo bum tuar

Harsat pittawp tuar rerotu Mindat raltlan pawl hrang Rs 96.5 lakh (kyat ting 2000) bawmnak an kuat mi cu an kuatnak bank account neitu in a ei-ruk tiah theih a si.

Paisa eiruk tiih puh mi Pu Mang Lian cu Kawlram suak, Aizawl ih khawsa innsang nei zo a si ih, Aizawl ih um NLD palai hlun theihpitnak thawn a hnen ah paisa an kuat tiah an sim.

Paisa kuat mi cu ramleng um Mindat pawlkom dangdang le bulpak hnen ihsin khawnkhawmmi raltlan bawmnakding a si ih, 2021, September thla lam ihsin bank account 3 ah ṭhenṭhek in an kuat khawmmi tiah an rel.

Amah hi kum 3mi fanu pakhat nei zo a si ih, tuhlan ah India-Myanmar ramri ah ကွမ်းသီး thawn pehparmi pursum tuahtu a si. A pa hi Thantlang peng, Dawn khawmi a si ih, a nu cu Falam mi a si.

Hih thuthawn pehparin IMCO – International Mindat K’Cho Organization ṭuanvonei mipakhat cun “kan mah Cho daan vekin a sungkhat naivai hnen ihsin paisa kan ngah sal hlan lo kan nor ding” tiah a ti.

Leave a Reply

Your email address will not be published. Required fields are marked *