Party khat le khat Puh Awnak ah Mipi Fimkhur Ṭul

Rampi hril awnak a naai thlang ruangah ramkhel party pawl pakhat le pakhat puhmawhnak hawl tam caan a siih mipi pawl fimkhur a ṭul ti`n Falam Watch Group (FWG) in an sim.

USDP zung, ṭuanvo nei pakhat cun khualam ih thuleng thawn pehpar in “kan party hi ralkap hlun pawl lawnglawng ih hruai mi a si tivek in khualam ah midang party in an sim tam tiah kan thei saal. Thuthang siar tamtu pawl cun kan party USDP ah mithar tampi in an kaihruai vivo timi an thei ko ding” ti`n a sim.

Falam NLD ṭuanvo nei pakhat khal in, “kan party hi Kawl party a si ruangah vote pek lo ding tivek in Lai party pawl in an sim tam. Kannih hi Kawl party kan si lo, rampi party kan si” tiah a sim ve.

Falam CNLD ṭuanvo nei pakhat cun, “atufang dinhmun ah kan party hi soisel tuarbik kan si men ding. CNLD nan vote ahcun USDP thawn an kop aw ding ruangah silole ralkap thawn an kop aw ding ruangah mipi nan harsa sinsin ding tivek in si lo tuktuk pawl an sim.”

“CNLD in ralkap khal kan kop lo, USDP khal kan kop lo, Chin miphun in Chin party an vote pang ding timi an phang tuk ruangah thuphanphan an simmi men a si” tiah a sim.

Falam Watch Group sungtel pakhat cun, “Politics timi cu duh a nung tuk, anmah party hnakin kan mah party in thil ṭha kan tuah thei sawn tiin a ṭhatnak lam ih zuam awk a si ruangah thil ṭha a si. Asinan mah lam ṭhat cuh tuknak ah midang pal ta fekfek cu a ṭha lo” ti`n a sim.

Election tikcu a si ruangah party khat le khat puhmawh hawl aw caan a siih an soisel aw ding cu daan a si na`n mipi pawl in cuitiih an ti aw mi parah zum thluh maimai loin fimkhur zet in thuhla umdan thlir thiam a ṭul ve ti`n FWG pawl cun an sim.

CH daily news

Leave a Reply

Your email address will not be published. Required fields are marked *