Party hruaitu ṭongkam cun mipi Lung a kuai ter

Kum 5 sung Myanmar rampi kaihrui tuding hrilawknak cu November ni 8 ah tuahfel a si zo ih hmun tamzet ih vote result phorhsuah rero lai a si.

Zo party in nehnak a co timi cu phuan a si hrih lo nan vote result suak sun tarlang mi vek a si ahcun nehnak cotu party cu a ciang zo tisehla a sual lo ding.

Tuhrihtiang Chinram vote result khal ah NLD in hmai a hruai ih party hruitu ṭhenkhat cun nehnak kan co tiah online ah an au celcel zo.

Chinram ṭhangsoter duhnak lungthin thawn a zuam vetu party dang khal cak lo ding dinhmun ah ding hai hman khal sehla mah party cio dinpitu mipi hnen ah thazang pek nak awkam thawn hnem aw cio an si nan party hruitu ṭhenkhat ih Chin mipi hrang ṭong suak mi cun mipi lung a kuai ter.

Cumi cu CNLD sungtel mipakhat in “Kyat thawngnga, thawnghra, tingkhat an lo pek mi khan kum 5 a lo deih lo ding nan sikhaw! Ka lo pam hmai, ka thin na tina tuk aw e” ti`n online ah a thlah mi a siih cuih khihhmuhding pipa umngailo mi puhawnak cu mipi in hmuhsuam a si tiah lungkuai in online ah ca an thlah.

Hihthu ah Falam khuasung um mipakhat cun “thazang pekawnak awkam le hmailam ah mipi lungmuril ih ciahnehtu si thei dingin zuam kan tum ding tivek ṭongkam hmangsawn lo in mipi riangri nautat ṭongkam in phut hi cu kan tuar na tuk rori ih hih ṭongkam hin an hmakhau a phit sawn riangri ding phan a um” tiah FOM hnen ah a sim.

Chinram online khawvel khal ah cuih mipi nautat ṭongkam cu an sawisel zet ih “kan ram ah ra zuam hrimhrim nawn hlah” titiang in ca an ngan a si.

Leave a Reply

Your email address will not be published. Required fields are marked *