Paralṭha Salai Van Biak Thang ruak cu sianglo cing ten April 2 ah an vui +an kahawkdan thu felfai

Ralkap/palik pawl in April 1 zaan ih an kah that mi Salai Van Biak Thang (@ Nyan Lin Htet) ih ruak cu April 2 zaanlam ah an vui tiah theih a si.

A mah hi Khaikam ih um a si ih an kap lai fang hmutu an um lo. April 2 zing ah Kalay university kiang ah thi cia in a ruak an hmu mi a si.

“Khaikam palik pawl in Chin ramkulh ihsin mipi kilhim dingih Kalay suk pawl an rak kap. Bawm dingin thu kan dong ih kan so. Kahawknak ah mipi lam mipahnih hliam an tuar. Pakhat sawn cu rubber cerek thawn an kap ngah ih an pahnih in besia ciamco cu an si lo” tiah mipakhat in a sim.

Mipi kaptu cu Kalay University ih um hmun khuar kawl ralkap le Khaikam palik an si tiah theih a si ih kahawk ngaingai cu minute 30 sung hrawng a rei tiah a hmutu pawl in an sim.

Zaan hnu ih kahawmi a si ruangah ralkap le palik hliam tuar, mithi an um le um lo theih fel a si lo.

Salai Van Biak Thang thih thuthawn pehpar in thuhla felfai theitu mipakhat cun “Kalay University sungah ruak pakhat a um ti kan thei. Kan lam mipakhat a hlo ih a thuamhnaw hruhmi le a riruang pawl kan khaikhin tikah amah si ko ding ti`n zaṭek 99 kan nemhnget” a ti.

Mino pawl in a ruak lak an tum nan ralkap le palik pawl ih bawh thup an phan ruangah a zaanzaan in an cangvai thei lo.

April 2, khuavang hnu lawngah Salai Van Biak Thang ih ruak cu an lak suak thei ih a umnak Khaikam khua ah an tlunpi tiah theih a si.

Salai Van Biak Thang cu “Kawlca major” thawn phunsang tlawng kumhnihnak kai lai a si ih a thih ah kum 19 telawng a si lai. (Lawrkhawm) (zuk : Zalen)

Leave a Reply

Your email address will not be published. Required fields are marked *