Paralṭha 2 in ram le miphun hrang nunnak an hlan

Atufang, Kalay sehvel doawknak boruak ah CNDF ralkap 2 in ram le miphun hrang nunnak an hlan tiah kan thei.

An pahnih hin doawknak hmun pakhat ih nunnak liam siloin ni 4 dan ah ralhraang kut tuar in an nunnak a cem mi a si.

CNDF ralkap pakhat cu April 9 Kalaymyo doawknak ah ralhraang kut tuarin a nunnak a cem.

CNDF ralkap pakhattu sawn cu Kalay peng, Chaungkhuah doawknak ah a nunnak a liam.

April 11 doawknak ah ralhraang phukpi kahnak hriam a tuar ih April 13 ah a nunnak a cem tiah theih a si.

CNDF ralkap 2 thih thu thawn pehparin atu ca kan ngan tiangah CNO/CNDF in thuthannak zianghman an nei hrih lo.

Atufang hi Lairawn boruak a sosang zetih nitin kahawknak thawmvang theih ding a um. Doawknak ah mipi humtu ralkap lamah ram le miphun hrang nunnak hlantu an um bangin ralhraang lam khalah mithi le hriam tuar an um a si.