Oxygen vuah Mina besia pawl khal Siizung ihsin an dawi suak thluh

Hakha Siizungpi cu March 12 zinglam ah ralkap pawl in an luhhnawh ih CDM i teltu Siizung hnaṭuan thuhla an suh hnu ah CDM teltu pawl cu zaanlam nazi 3 khelin an umnak cozah inn suahsan dingin thu an pe.

Hakha siizung ah hin mina 20 luan hrawng an um ih besia deuh pawl cu siizung ah umter hrih ding ih ruah a si nan zaanlam nazi 3 a kim taktak cu mina besia operation tuahpekte to khal to theilomi mina tiang an dawisuak thluh.

Hakha mino pakhat cun “mina besia thlohthloh tiang an dawisuak hi cu thin na um tuk. Siizung lenglam ah mina besia bp an tah lai tivek ka hmu tla hi cun ka mitthli a tlak. Naupai pailo, mina besia sialo khal um lo in an zaten rorin ralkap pawl in an dawi suak thluh” a ti.

March 12 Zing ah ralkap in Hakha siizung an luhhnawh thuthawn pehparin SAC chairman Pu Ngun San Aung cun “Security hrang ah an lut mi si. CDM a lut mi pawl kha hna nan ṭuan pehzom ding maw tiah an sut dingih an ṭuan loding cun zaanlam nazi 3 hlan ah siizung hnaṭuan pawl umnak quarter suahsan dingin an fial ding. Cule ralkap lam in hnaṭuantu dang an rak thlah ding” a ti.

CDM teltu siizung hnaṭuan thil thairbawm dingin vengtin mino an suak ih motor nei pawl khalin manlo in thilthiar an bawm tiah theih a si.

Falam le Tedim khalah Siizung hnaṭuan CDM teltu hmuahhmuah cu zaanlam nazi 3 hlan ah an umnak quarter suahsan dingin ralkap pawl in thu an suah ih thil ṭhawn bawm ah mino tamzet an suak tiah theih a si. (Lawrkhawm)

zuk : CNJ

Leave a Reply

Your email address will not be published. Required fields are marked *