Nuralṭha Lal Lian Zuali thih dan cu hitin an sim fiang

Yangon Ramṭhen, Mingalar Taungnyunt, Kandawlay veng ih We Love Myanmar zung cu March 21 ah kawl ralkap le palik pawl in an luhcilh ih culai fang ah Chinmi Lal Lian Zuali (kum 30-35 hrawng) cu ralkap pawl ih luhcilhmi innpi dot 5 nakin a tla that tiah theih a si.

A thih dan thu ah media dangdang in a phunphun in an ngan ih, ralkap pawl in meithal thawn an kap hnu ah an tul tlak mi a si titu khal an um ih ralkap ṭih ah a relh nakin a tlak sawnmi a si tikhalih ngantu an um.

Cutin, Ma Zuali thih dan thu phunphun a suak lai ah kan Chinmi rinsantlak mipakhat cun hitin a ngan.

“Kum 35 mi Ma Zuali hi Nurse a siih a umnak innpi ihsin ralkap pawl ih cangvaihdan a rak zuk thup. Ralkap pawl in rinlopin a hun hmu dukdi ih meithal thawn an kap nan an ṭhelh. Kai dingin inn tlun ah an so tikah Maa Zuali cun a ṭih tuk ih inn dunglam ah relh dingin a tlan.Vansiat nakah a fehnak rangva (sunshade) kha a rak rop tukih, cutin inn dot 5 nakin a tla that a si” tiah mipakhat in Facebook cahmai ah a tarlang.

Ma Zuali ruak cu ralkap pawl in an phur ih, atuah Mingaladon ralkap sizung ah ret hrih in a um tiah theih a si.

Aruang hi thaisun March 22 ih zohfelnak an nei hnu ah a sungte pawl umnak Kalay Myo, Saṭawm veng ah an phur so tum tiah theih a si.

Nuralṭha Ma Zuali thih dan/atlak dan thu ah hin relbuai ding a um hran lo. Dothlennak ah nunnak pek in a thi a si ti`n upat peknak kan nei ding hi a thupi sawn.

Leave a Reply

Your email address will not be published. Required fields are marked *