Nunnak liam tiang Chinram humngamtu Salai Cung Nawl Piang upat an pe

Ram le miphun hrang nunnak liam Paralṭha Salai Cung Nawl Piang cu ram le miphun hrang a tuar ngamnak sunloih upat pek in Falam View Point ah a zuk tarnak le cangan phunphun tarnak in upat an pe.

Pu Tha Rain Mang le Pi Saw Kip Thaim tei` fapa, Khuangli khuami Salai cungte cu May 21, CNDF le SAC ralhraang doawknak ih nunnak liam a si.

Doawknak ah ralhraang bawi pakhat telin ralkap 6 an thi ih 2 in hriam an tuar tiah theih a si.

Kahawknak thuthawn pehpar in Chin National Organization cun “Chin ramkulh, Falam peng, Lumbang khaw kiangah May 21 zing nazi 8 hrawngah CNO/CNDF le tualthat acozah ralkap pawl karlak kahawknak a suak ih CNO/CNDF lam ihsin mi ralṭha pakhat in nunnak a liam, tualthat acozah ralkap lam ihsin ralbawi (Captain) pakhat telin ralkap 6 an thi.”

“Tualthat acozah ralkap pawlih mawṭaw khal lamzin thlangah a let thla. Tualthat acozah ralkap lam ihsin ralkap pakhat hriamhma tuar telin a dang ralkap pakhat, an zaten ralkap pahnih an tlansuak thei” tiah official in an phuang.

Ram le miphun hrang nunnak liamtu Salai Cung Nawl Piang upat peknak le riahsiapinak capi khal an suah ih “Chin National Defense Force sungtel Salai Cung Nawl Piang cu amah ih tiamkamnak a tuah vekin Chin ram le miphun humhimnak hrangah raldo phahin 2021 May 21 ni ah a nunnak a pe a si.”

“Miphun dothlengnak hrangih a pum pek-awknak parah CNO/CNDF in upatnak sangbik kan pe ih a tantami sungkua pawl thawn bangrep in kan tuar zet a si” tiah an tarlang.

Leave a Reply

Your email address will not be published. Required fields are marked *