Myanmar President in Surbung vanzam tualrawn ṭuanpeh lawlaw dingin Fial

Zaṭek 97% ṭheh a si zo mi Falam, Surbung vanzam tualrawn cu ṭuanvo neitu pawl in ṭhehsuak lawlaw ko ih ṭuan dingin Myanmar President in a fial tiah theih a si.

June 25 ihsin 27 karlak, flight check nei nak ah vanzam ṭum/zuang tikih hnaihnok thei, ṭihnung deuh mi tlaang bawk 2 ṭhiatbal ṭul an hmu ruangah tuvekin Myanmar President in ṭuanpeh lawlaw ih ṭhehsuak tiang ṭuan lawlaw dingin a fial mi a si.

Cuhleiah vanzam tualrawn zaṭek 97% sak nakih an hman mi hmanrua pawl khal, tlun hrih lo dingin le tlaang bawk kehlam ṭhiat hmaisa in a sangsang ten ṭuan ṭheh lawlaw dingin union Minister in Surbung vanzam tualrawn ṭuanvo neitu hnen ah a sim than thu khal theih a si.

Hih thuhla cu cozah hnaṭuan rinsantlak, mi pakhat in a Facebook cahmai ah a tar ih, ca sung ahcun “Surbung vanzam ṭumnak hi tlang bal ta lo i ṭum ding cu pilot pawlin an duhlo ruangah bal ta ding asi.

Cumi thu khal tamadah in a ṭheh tiang tisuak lawlaw ding a ti ih, union minister in nan cet nan khawl pawl pakhat hman tlung tir loin kehlam ih tlangte khi rak bal hmaisa ding, cumi ṭheh in vorhlam tlang khal bal cih ding tin a fial thu theih asi” tin a ngan.

Tipi thuanthum ihsin feet 6000 sangnak ih sakmi Surbung vanzam tualrawn cu kum 2015 ihsin sak ṭan a si ih saknak man ah 34 billion kyat (US$24.34 million) hrawng an cemliam a si.

Vanzam tlannakding lamziin cu a sau lam ah ft 6000, kauh lam ft 100 a siih France le Italy ram suak vanzam ATR-72 phun ṭumnak dingih sakmi a si.

ref: Pu Ngun Thawng

Leave a Reply

Your email address will not be published. Required fields are marked *