Myanmar ih Bel-khuang tum Revolution le Estonia ih Hlasak Revolution – Pu Thawm Mang

Letland (Latvia) le Esland (Estonia) hi 1991 kum ah USSR (kha lai ih Union of Soviet Socialist Republics) hnen in meithal tello, hlasaknak thawn independence an rak sual ih atawp ah zalennak taktak anngah thei.

Ahleice in Estonia pawl hi ancangvaih dan zoh anuam hleice. 1988 August kum thok in anram sungah Soviet hnuai ah umthotho in Autonomy sangpi ngah duhtu group le Independence rori duhtu tiah phun 2 an rak um. Himi thu ah hitin an ngan “Their mentality changed from, “It cannot be done” to, “We’ll do it anyway” Acang theilo timi ruahnak cu kan zuam koding” timi lungput ah anthleng ti asi.

June thla ih tuah mi an hnam daan khawmpi ih mi 100’000 rual tongaw pumkhawmnak ah rinlo pin an hnam hla cu sunvu/zaanvar ansak ti asi. Cutiih, hla an sak lai rakzohtu cun hitin asim – “As one participant observed, “If 20,000 people start to sing, you just cannot shut them up, it’s impossible.” Minung thawng 20 in hla an vun sak taktak ahcun na cawl ter theilo ding a ti.

Hivekih hnamhla ansak nak thawng in lungrualnak le tumruhnak annei sinsin ih 1991 kum ah meithal puakkhat hman puakloin zalennak (Independence) an ngah.

2021 Kumthar ah kannih Myanmar mipi in ralkap uknak duhlo in lungrual zetin zantin kan bel le pakan hmuah siat thluh ko in kan tum ih lungduhdilnak kan tuah.

Hivekin kan mipi in banglo in tum-peh vivo in, hnam duhdawtnak hla sak peh vivo sehla, zumtu pawl in thlacam nak thawn anung Pathian ko sehla, Kansuahkeh covo zalennak cu ralkap kut i sin kan la suaksal ding ih zalennak ram taktak ah kanfehsal thei ko ding.

Photo 1: Estonian singing revolution 1988
Photo 2: Burma news… 2021
(88 Chin Tlawngta Pu Thawm Mang nganmi a si)

Leave a Reply

Your email address will not be published. Required fields are marked *