Myanmar Cozah in Surbung Vanzam tualrawn thawn pehpar mi thuphuangnak nei

Chin ramkulh sungih hmaisabik vanzam tualrawn sidingmi Surbung vanzam tualrawn thu thawn pehpar in Kawlram cozah in thuthar phuangnak a nei.

Surbung Vanzam tualrawn cu zateek 95% ṭheh a si zoih, tuah, Vanzam ṭum thei dingin tualrawn ih cet hmanrua pawl hna ṭhaten an ṭuan thei maw theilo vansang ihsin mithiam pawl in zohfelnak an nei dingih ni 25 ihsin 27 sung a ṭuldan ih zirin zohfelnak an nei ding.

“Zohfelnak kan nei ding mi cu tualrawn ih cet hmanrua pawl dik zetin hna an ṭuan thei maw tihi a si, Cet cun tualrawn umnak, a kiangkap ih um tlaang umdan pawl, technology hmang in vanzam mawngtu hnen ah a kuat ding. Cet in peng 50 ihsin peng 150 kiangkap ih tlangumdan, mero zaamdan, an fehnak lamzin dik maw diklo, vanzam ṭumnakding runway umnak tvp automatic system hmang in vanzam mawngtu a kuat ding. Vanzam khal a ṭuldan ih zirin ṭum khal si thei, ṭumlo khal si thei.

Airport peng ziat hrawng a hlat, ziangtluk hrawng in a sang timi zohtheinak cet khal zohfelnak kan nei ding. Cule, nikhua tahnak cet khal zohfelnak kan nei ding. Himi cet cun thli hrangdan, thli tha, thli hlum le runway fiang zetin a um maw tvp cu vanzam mawngtu hneh ah a kuat ding. Cuvekpawl cu zohfelnak kan nei ding a si.

Vanzam fehnakding lamziin, khawilam zawngin feh le khawi ah a thleng ding, lamzinn ah thilṭihnung a um maw um lo tipawl zateek 100% rori ciang thei dingin van par in zoh ding a si” tiin Kawlram Vanzam lam ih thuneitu U Kyaw Suu cun a sim.

ATR-72 VanZam

“Surbung Airport ih bun mi vanzam signal peknakding Antana pawl a dik maw diklo timi, peng 5-6 hrawng hlatnak ihsin vanzam thawn zam in zohfelnak kan nei ding. Yangon ih um Vanzam hman ding mi ah a ṭulmi cet pawl bun ṭheh in June 25-27 sung ah zoh ding a siih mipi to thei tikih ṭul pawlmawh mi pawl ciang ṭheh dingin zohfelnak kan nei ding.”

“Vanzam ṭumnak tawlreltu lam in cu nylon kattaya khal phah ṭheh a si zo ih airport enkoltu le mikhual vanzam hngaknak inn pawl khat sak ṭheh a si zo ih tu ahcun a tawp lam tuahṭulmi malte lawng a tang thlang a si” tiin U Kyaw Suu cun a sim bet.

Surbung airport cu tlangpar ih sukso khualtlawngnak, hmunhla thawn olten pehzom tlawngawtheinak, damalonak, buainak tivek tong caan ih hmunhla thawn olsamten sukso pehzom theinak ding ruahsan ih tuah mi a siih a rei hlan ah onpuai tuah leh a si ding.

Surbung Vanzam tualrawn cu zaṭek 95% ṭhehfel a si zo ih tidai, meisa le tualrawn enkoltuding umnak, vanzam hngaknak inn pawl khal sak ṭheh a si zo.

Covid 19 damlonak ruangah tumtah vekin ṭuan theih a si lo ruangah kim cang ten ṭuan ṭheh thei a si lo ih, rem cang in nikhua a ṭha le June 25 ihsin 27 sungah vanzam thawn vansang ah zam in a ṭulmi pawl zohfelnak nei ding a si.

Tipi thuanthum ihsin feet 6000 sangnak ih sakmi Surbung vanzam tualrawn cu kum 2015 ihsin sak ṭan a si ih saknak man ah 34 billion kyat (US$24.34 million) hrawng cemliam a si.

Vanzam tlannakding lamziin cu a sau lam ah ft 6000, kauh lam ft 100 a siih France le Italy ram suak vanzam ATR-72 phun ṭumnak dingih sakmi a si.

Leave a Reply

Your email address will not be published. Required fields are marked *

error: hahahahahaha !!