Mizoram ih hnaṭuan Chinmi thih thu ah YLA lam in simfiahnak an nei

Mizoram, Sangau khua, Thlaam pakhat ah thi cia in a ruak sar a simi KyawKyaw thih thuthawn pehparin Young Lai Association lam in an hmuh tonmi simfiahnak an nei.

Nga kai sianglonak Tiva ah Nga bomb a puah ruangah Sangau khua ih YLA ṭuanvonei pawl in an vuat that tiah media ṭhenkhat in an tarlang ih, cumi thu thawn pehpar in Young Lai Association cun an pawlkom sungih ṭuanvoneitu pawl ih hminkhen mi simfiahnak caphek pahnih an suah.

Cuih caphek cu tufang online ah a lar zet. Hakha/Thantlang ṭong thawn nganmi a si ih a tawizawng in kan run let sal a si.

Zapi hnen ih Thilumdan Simfiahnak

“Kaylay Myo, Tayakone khuami Pu Kio Tum nau Dar Hei fapa KyawKyaw cu hna a ṭuan nak hmun, India le Myanmar ramri, Sangau khua ih Tiva pakhat ah ngakai bomb a puah ruangah Sangau Branch, YLA (Young Lai Association) ṭuanvonei pawl in an vuat that” tiah social media ah cathlahmi a um.

Cumi thuthawn pehparin Mithi tu umnak inntek Pu Vanlalfel te innsang siseh, Village Council Sangau-1 le YLA Sangau-1 Branch pawl in KyawKyaw thihdan thuhla a ngaihventu pawl hnen ah kan hmuh tonmi thu umdan dik simfiangnak kan nei duh.

Tanglam ih kan nganmi pawl hi thudik kan hmuh tonmi a si ih KyawKyaw thih dan kan theifiang theinak dingah a thokin a cem tiang in siar sak ding in zangfah kan lo dil.

KyawKyaw hi kum 2015 ihsin Sangau khua, Pu Vanlalfel te inn ih khawsa a si ih Pu Fela in a fa vek rorin a zohkhen mi a si.

Kum 2012 thok khan Young Lai Association, Sub-Headquarter in Sangau peng sung ih Tiva pawl ah Bomb, Dynamo, Lenkhang zar, Nga kai/thatnak sivai hmanglo dingin thusuahnak a nei. Cumi cu Young Lai Association, Sub-Headquarter, Sangau peng ih YLA Branch 13 pawl khal in an pompi vemi a si ih mah le naivai Tiva pawl cu mah le Branch cio in kilvengnak an nei.

26/12/2020, zaanlam nazi 5 luan hrawng ahkhan Sangau-1 Branch YLA nih an ram Tipi ah bomb puah thawm an thei. Cuveten ṭuanvonei pawl in zingzoinak an nei cih ih Tipi umnak, bomb puak awn an theinak hmun an va pan cu Pu Vanlalfel te inn i um KyawKyaw cu Thlaambun ah an va hmu.

Bomb puak thuthawn pehpar in thudik simfiang dingin YLA ṭuanvonei pawl cun KyawKyaw hnen ah thusutnak an nei nan “kei mah ka si lo” ti`n thuphan a per. Tiva ih bomb puah cu YLA nih poimawh tukih a ruat mi a si ruangah ṭuanvoneitu pawl cu awka hrang deuh in thusutnak an nei bet ih mauphek thawn voihnih-khat an thawi. Kum upa lam a si hlei ah taksa zawng khalin mi cakvaktuk a si lo ruangah natuk khal in an thawi lo.

Cuhnu lawng ah Bomb puak mi thu a relsuak ih an umnak thawn metre 100 hrawng hlatnakhmun, bomb puahnak hmun ah a hruai hai. Bomb an puah taktak timi fiangsinnak dingah Ti par ih nga thi ṭhenkhat cu a mah rori an vung sar ter hnuah an tlun san. An tlung zik ah ‘kan rual ah ra tlung ve aw’ an ti nan ‘Zuu ka in tuk, ka hrawng ahcun ramriak hi a ṭhasawn ding. Cuhleiah ka nuamsam lemlo ruangah in tlun san men uh’ tiah a let hai.

An tlun zik ah Kyawkyaw cu itkhun ah a it i, ‘ka khua sik deuh ruangah puan in thluah uh’ a ti hai. An hnen ih tlung ve dingin an sawm sal bet nan a duh lo ruangah an tlun san. KyawKyaw umnak inntekpa Pu Vanlalfel khalin Lo ihsin an tlung zikah Kyawkyaw cu tlun a sawm nan a peih lo thu cu khuatlang hruaitu hnen ah a sim a si.

Miṭhenkhat cun YLA ṭuanvo neitu pawl ih vuakvelhnak ruangah a thimi a si tiah an sim nan mithi tei` innsang le YLA karlak khalah sual puhawknak ṭongkam ziang hman a um lo.

YLA le mithi tei` innsang remrelnak in KyawKyaw thihnaksan an ngan nak Signboard khalah Lungtur natnak ruangah a thi tiah an tarlang fawn.

YLA tlangval fala pawl in an mah sungtel mithiruak an fingkhawi dan vekin a nih khal an buaipi ih Thlanpi khal an tuah sak ih a ruak vuinak khal ah an telpi fawn.

Curuangah, Social Media ah KyawKyaw thih thuthawn pehparin thuthang diklo ngantu pawl kha zamrang thei bikin delete sal lohli ṭheh dingin zangfah kan lo dil.

KyawKyaw thihnak thu ah hin thu umdan simfing hnu khalah ringhleltu kan um thotho a si le aruak Post-mortem tuah khal kan ngam a si.

Kanmah Laimi, kan Media pawl in thudiklo an nganmi pawl hi phuahcop a si tiah rak fiang tum cio uh si. Laimi le Laimi, U le Nau kan karlak ah remdaihnak ṭhiatbaltu le pehtlaihawknak hri dor tertu si lo dingin a tu thok in himi thuhla hi a diklo zawng in langter hram lo dingin zangfah kan lo dil a si.

(V.LALDUHTHIAM)
President

(BIAKVUNG)
Secretary

KyawKyaw ruak an vui hlan te …….

Siarbet : Mizoram ah Vuak vual neh thawn thi mi Chinpa` Ruak An Sar

Leave a Reply

Your email address will not be published. Required fields are marked *