Mizoram ih Chin pa thih thu ah Chinram Cozah vuihraamtu an tam

Mizoram, Sangau khua, Lo Thlaam pakhat ih miruak sarmi Chinpa thih thu ah mipi lamin sawiselnak a phunphun a suak ih Chinram cozah, Chin Human rights pawlkom le NGO tiang an hraam a si.

Mithi tu hi Kalay Myo, Tayakone khuami Pu Kio Tum nau Dar Hei fapa KyawKyaw a si ih Mizoram, Sangau khua ah a umum ṭuan ih khawsa a si.

26/12/2020, zaanlam nazi 5 luan hrawng ah a umnak innteek te pafathum thawn YLA Sangau-1 Branch ih nga kai kham mi Tiva ah nga kai bomb an puah.

Zaan thim hnu ah YLA Sangau-1 Branch ṭuanvonei pawl cun bomb puak awn a suak nak lam pan in zingzoinak an va nei tikah Tikap Lo Thlaam ih rak um KyawKyaw cu an va hmu.

Bomb, Dynamo, Lenkhang zar, Nga kai/thatnak sivai tvk hmansianlonak Tiva a si vekin YLA ṭuanvonei pawl cun bomb puah awn an theimi cungcang sutfiangnak an nei.

YLA lam ih simfiahnak caphek an suahmi vek a si le KyawKyaw hin thusutmi ṭhiṭhain a sim duhlo ruangah YLA ṭuanvonei pawl in mauphek thawn voihnih-thum ciar kan vuk ti a si.

Cuih caphek ahcun “Nga kai bomb kan puah” ti`n Kyawkyaw in a phuangaw hnu ah kan tlun san ti`n an tarlang.

Young Lai Association Sub-Headquarters:Sangau ih simfiahnak ca suah mi

KyawKyaw hi a taksa nuamsamlo ruangah a innteek te rualah inn lam tlung loin Lo Thlaam ah a tangta mi a si ih a thaizing ah a umnak innteek pa` fa le in an tantanak Lo Thlaam ah thi cia in a ruak an sar a si.

KyawKyaw thih thu ah hin hmuhdan phunphun a suak ih YLA lam cun kan mai` kut in a thi mi a si lo tiah mipi hmai ah an kut an kholh fai.

“Napin kan thawi lo. Nuamsam loin a um cia ih kan tlun zik khal ah tlun kan sawm nan khua lam ih tlun a peih lo. A khua sik tuk ruangah a it ih kan tlun zikte ah puan khal kan thuah ta. Lung lam damlonak ruangah a thi mi a si ih a sungte lam le YLA karlak khalah buainak zianghman a um lo. Rinhlehawknak zianghman a um lo” tiah YLA lam in simfiahnak an nei ih “KyawKyaw ruak khal cu kan mah YLA member vek rorin Thlaan kan tuah sak ih kan vui liam a si” tiah an tarlang.

YLA lam cun, cutin, siattong innsang lam ih lungkimnak thawn KyawKyaw ruak vui liam vekin an tarlang nan KyawKyaw tei` innsang in an lungkim lo thu social media ah an tarlang.

KyawKyaw hringtu nu cun “Kei hi Kyaw Kyaw hringtu a nu taktak ka si. Kyaw Kyaw a thih ni ah Sangau khawlal le an mino president ka phone ih ‘a ruak rak phum hrimhrim hlah uh. Saiha ah fehpi uh’ tiah ka timi cu an duh hrimhrim lo. Cutiasile ‘Tipi tiang phur uhla kanmah in kan ra phur mai ding’ tiah kan ti nan, an duh cuang lo. Curuangah kan lungkim lopi in an phunmi hi hringtu a nu ka sinak in ka riah a se tukih ka diriam thei hrimhrim lo a si” a ti.

YLA lam in “KyawKyaw thih thu ah Lai media pawl in kan mah kut tuar ih thimi vekin an tarlang. Cumi kha thuphan hlir a si ruangah online ih ngan mi ca pawl kha in hlon sak lohli uh” tiah ca an suah ih “thudik kan sim hnu khal ih rinhlehnak neitu an um pang a si le KyawKyaw ruak khal cu post-mortem tuah kan ngam” tiah an tarlang.

Sangau khua, YLA ih suahmi simfiahnak thuthawn pehpar in mithi tu KyawKyaw farnu Len Zing Zathang khalin a lungkimlonak a ṭongsuak ih, a mah cun “Ka tapa cu zangfah lainatnak nei loin nan thawi, nan vuak ih a thih phah. Minung siloin ramsa vek rori nan si. Cumi hnuah Kyaw Kyaw cu Sangau khua YLA ih thah a silo tiah ca nan suah bet. Ka ṭapa thih thu ah kuttuar a silo ti cu zomaw rel ngam? a umnak pa maw? a thih laiah a hmu mawsi?

“Nan duhduh in thu nan thleng rero men. Nan velh nan vuak hnuah amah lawng Thlaam ah nan tan cu a thih san ziangtin nan thei ding? Nikhat hnu nikhat nan thu nan thleng nan, ka ṭapa cu vuak ih thi cu a si. Thutawi tein cemralter men nan tum cu minung ciocio kan si. Ziangtin velh,vuak that a silo nan tithei” tiah ca a thlah a si.

Cutitiang, siatton innsang lam in an lungawilonak an lang ter nan Chinram cozah le Chinram ih rinsantlak NGO pawl ih hmalak tumnak a um lo tiah mipi lam in an vuihraam.

Mipi lamin sawiselnak tamzet a suakmi lak ah Chin upa rinsantlak PU L B Khum Mapuia ih auaw cu a tanglam ah kan run tarlang a si.

Sangau YLA le Chin pa Thihnak Thu:

Sangau YLA in Chin pa an thawithat mawsi? Silole a mai damlonak ih thi saw? Bawmtu le runtu neilo in ziangtiang kan tuar lai ding? Acozah dinglai Party an cangvai keimaw? Miphun duhdawttu party teh theilobang in an relh hlo mending saw? Kan NGO cak zetzet pawl in teh “Aw” an suahngam kei maw?

Chin mi pawl in kan unau naibik tiah Mizoram sungah ei le in hawlin minung tampi kan lut-suak. Anmah vek mi fel le tha tampi kan um ve. Asinan mi thalo le acozah duhlo thil tuah khal bo lo. Ziangvek a sikhale acozah duhlo zawngih nung cu an ram daan vekin acozah ih lairelsak ding a siko. Asinan a let a lingin NGO phunphun kutthlak ruangah Chin mi ziangmawzat ih nunnak a liam zo.

Tuih thi hi ‘Sagaing Region’ ih Chin pa a siruangah S-CAM le Chin state CM siseh NGO le mipi khalih dinpi ding a silai ah thawmvang suahngam an ummaw? “Arte thih” ih kan liam men theu hi thin a va na duahdo em. Hmailamah kanmah, kan unau, kan rualtha le kan miphun an thi lai ding (Tuvekih kan um men a sile).

Mizoram sungih Chin mi kuttuar kan thih ih an simdan tlangpi pawl cu:
1.Sangkate ihsin a dawp ih a thi
2.Kham-hraap ah a dawp ih a thi
3.Kan hmuai liamlo ih cuvial

Sangau YLA President ih simdanvek a sile “Minung pa 6 in vei 2/3 cio kan thawi. Nunnak tiang ih poi ding cu a silo” tiah simnak a nei. Asinan “Mithi tong theilo cu duh duh ih puh le sim a theih” sisi tiah mipi cun YLA President ih simmi an zumlo lawlaw.

Khatlam zawng ahcun kan thawithat a sihmanah hnuthlurtu Myanmar acozah lubaan an cangvai cuang lo ding. Myanmar minung cu mi aa le mi fahrah tete an siih ziang pipa an tithei cuang zik lo. Chin mi sung ihsin Pawlkom cangvai thei/ngam an um zik lo tihi an theituk a bang, hmuhsuam tlak in kan um mawsi? Sangau YLA in kut an thlakhnu a thaizingah thi cia in thlamah a ruak sar a si. Mithi ih nu khal in Palik theihter in post-mortem tuahsak dingah YLA president a cah. Cumi an titheilo pang a sile “Ramri tiang in phurhsak uhla hilam ihsin kanmah in kan lak ding” tiah a tibet. Asinan palik le sizung lamih cekfel umlo in an phum daih. Pakhat tete in maw kuttuar ih kan cem vivo lai ding???

Siarbet : Mizoram ih hnaṭuan Chinmi thih thu ah YLA lam in simfiahnak an nei

Siarbet : Mizoram ah Vuak vual neh thawn thi mi Chinpa` Ruak An Sar

Leave a Reply

Your email address will not be published. Required fields are marked *