Mizoram Chin raltlan : Kan ram ah kir sal in Ralkap Do kan man zo

Kawlram buainak cu a ninii in a sosang sinsin ih ralkap le palik kut tuar ih mithi khal an pung vivo. February 1 ihsin April 13 tiangah ralkap le palik kut tuar ih thi 1000 an kim zik thlang.

Cutiih kan dinhmun a sia tuk cu Mizoram ah raltlan dinhmun ih tlan lut Chinmi ṭhenkhat cun ramsung ah kir sal in SAC ralkap do dingah kir sal an man zo thu an rel.

Raltlan dinhmun in March 22 ah Ṭio tipi tan in Mizoram ih tlan luttu Salai Biaka cun “Mizoram ah raltlan dinhmun ih ka um hi keimah duh thlan a si lo. Ralkap in in hawl nasatuk ṭum ah ka sungte pawl in ka nunnak hrang tiang ruat sakin Mizoram lam ah tlanlut dingin in nor nasatuk ruangih thleng suak hi ka si” tiah zingzoinak neitu Chcha Varte hnen ah a sim.

Biaka le a nupi cu Chinram ih cozah hnaṭuan an si ih fa 2 nei zo an si. February 1 ah ralkap in kumpi cozah thuneihnak a la hnu, an kut hnuai ih hnaṭuan duhlo ruangah ralkap ukhruainak dodal in CDM ih teltu cozah hnaṭuan an si.

An innsang hmailam hrang ngaihtuah in a nu le pa in Mizoram ih tlanlut an fial hnu, March 22 ah kum 3 mi a fanu, kum 1 mi a fapa le a nupi thawn Mizoram ah an thleng suak.

“Kan zung ihsin mi 10 hrawng CDM ah kan tel. Himi cangvaihnak ih hruaitu cu ka si lo nan thuneitu pawl cun na si rori tiah in puh ih palik le ralkap in hawl ter. Inn khal ah kan riak ngam lo. Zarh 2 sung hmun remrem nakah ralkap le palik hrial in kan vaak vaai vivo” tiah Biaka cun a sim.

India central cozah hin a ramsung ah raltlan lut ter lo dingin thu a suah nan Mizoram cozah cun kan thisen zompi te an si ih a rem dandan in raltlan kan cohlang thotho ding tiah thu an suah. Mizoram ih tlanlut Myanmar raltlan tam sawn cu Mizo thisen zom Chinmi kan si.

Mizoram ih Chin raltlan tamsawn cu ralkap ukhruainak duhlotu cozah hnaṭuan le palik an tam. Chin palik tlan pakhat cun “tlunlam bawi pawl in a remcang dandan in duhphorhnak neitu mipi ṭhenṭhek in fial. Aṭul ahcun kap that hluhhlo dingin thu an suah. Nan, duhphorhnak neitu mipi cu ka uu kan nau pawl an si. Kan miphunpi, kan thisen zom an si. Zingtin kan unau, sungkhat, rualpi, phunpi te pawl cu zangfah lainatnak nei lo in meithal thawn kan kap thei ding? Cumi thil rapthlak kan tuah thei lo ruangah raltlan dinhmun in Mizoram ah kan tlanlut hi a si” a ti.

Mizoram ih Chin raltlan lak khalah dinhmun bangawlo an um. Salai Biaka vek miṭhenkhat cu sungkhat unau tawlrel saktu le lamziin khihhmuh mibawmtu pawlkom an nei ih lamtluan ah siseh, Mizoram an va thleng tik khalah umnak ding sungkhat unau an nei. Miṭhenkhat an si le sungkhat unau ṭha nei lo, neelrawn ih ziin hlo pawl bangin fehnakding thei mumal lo, vavai zetin an um ih miṭhen cu Mizoram an thleng thei ṭawkṭawk. Ṭhenkhat an si le ramri kiltu India ralkap in Myanmar ah an tlun ter sal.

Salai Biaka cun “CDM supporter khihhmuhnak le Mizoram ih sungkhat unau, mibawmtu pawlkom tawlrelnak thawn Mizoram ah buaibainak umloten tluang hahdam zetin kan thlengsuak thei” a ti.

Chin raltlan lakah sungkhat unau hnen ih um le NGO pawlkom hmalaknak hnuai ih umtu khal an um ih miṭhen cu nica kuli hlawh in mahte todelhawk duhtu khal an um tiah **** khuami pawl in an sim.

Mizoram ih Myanmar raltlan dinhmun zingzoinak neitu Firtpost ih hmuhsuah mivek a si le raltlan tamzet cu Mizoram lole ramleng hmun dang ih umlanta an tum lo tiah theih a si ih Salai Biaka khal cun “tuvek dinhmun a si cun tlun sal ka man zo” a ti.

Ziang tuah dingin?

Meithal hriamhrei neihsun hmuahhmuah phorh ih SAC ralkap ciimit dingin le Chin mipi humhim dingin…

Hminsin : Hmin lem hman a si.

Leave a Reply

Your email address will not be published. Required fields are marked *