Mizoram ah Vuak vual neh thawn thi mi Chinpa` Ruak An Sar

December 28 ah Sagaing ramṭhen, Tayagone khuami Kyaw Kyaw cu kuli a hlawh nak Mizoram, Sangau khua ih Thlaam pakhat ah thi cia in a ruak an sar tiah theih a si.

Amah hi Hakha peng, Dawng Va khuami Pu Dar Hei le Thantlang peng, Cawngthia khuami Pi Ci Pen tei` fapa a siih an sungten Kawlrawn lam ah cer ih khawsa an si tiah an tarlang.

Innsungsang harsatnak a phunphun ruangah Kyaw Kyaw cu kuli hlawh dinhmun in Mizoram ah kum tawkmawi a um zo.

A thih dan hi mi ih vuat that sivekin relsuak a si ih a ruak cu kum 5 lenglo a khawsanak Pu Fela ih fale pahnih in 28.12.2020 Tlawngkai nikhat zing ah Lo Thlam ah an hmu mi a si tiah kan thei.

Thuhla theiciangtui` relmi

Kyaw Kyaw le a umnak inntekpa Pu Fela le a fa pahnih cu Lo an feh ih 27.12.2020 zaanlam ah tluntim an tuah.

KyawKyaw cun “ka taksa a na deuh ruangah le Lo ih zaan riak hi nuam ka ti ruangah ka ra tlung lo ding. In tlunsan men uh” a ti ruangah Pu Fela te pafa thum cun inn lam pan in an tlun san.

An tlun lam Lamziin lailak ah Sangau-1 President Pu Ram Cung le a rualpi 6 thawn an tongaw ih cu pawl cun “Nga kai nakah bomb nan puah maw? A thawmvang kan thei ih” ti`n an sut ih an bag paimi pawl an dap thluh nan Maihnah le Anṭam lawng an hmu.

Cupawl cun KyawKyaw thuhla an sut bet tikah a si dan vekin Pu Fela te cun an sim ih YLA president le a rual pawl cu KyawKyaw riatnak Thlaam lam pan in an feh lan.

KyawKyaw umnak Thlaam an va thleng khalah ngakainak bomb puah thu an sut lala nan Kyawkyaw cun kan puah lo a ti. “Tipar ah nga thi ṭhenkhat kan hmu. In lak sak aw tiah an ti ih KyawKyaw cun damlo cingten a vung laksak ṭenṭo.

Video clip sung ih langmivek a si le Hnipuan ciar hruk KyawKyaw cu mibur in thusutnak an ciamco timi kan hmu thei. Pu Fela te cun ngakai bomb kan puah lo an ti nan video ahcun bomb an puah si vekin KyawKyaw in a rel. Thudik a sim khal si thei ih, an hrem nasa ruangah ṭih ṭong in a ṭongsuak mi khal si thei.

YLA President ih simmi ah Khua kan thleng veten Pu Fela tei` inn ah kan feh ih “Kyaw Kyaw cu hremnak mal lai kan nei. Mipakhat in voi hnih ciar kan vuak ruangah nan va zoh le a ṭha ding” tiah kan sim’ a ti.

Atlaizo ruangah thaizing lam ah ciamciam ten va zoh an tum ih 28.12.2020 zianglam ah Pu Fela ih fapa pahnih in an va zoh cu, nunnak cem zo KyawKyaw cu an va hmusuak.

KyawKyaw thih thu ah Mizoram cozah lam in ziangvekin hmalaknak an nei tum ti cu theih a si hrih lo nan, Mizo online khawvel ahcun “Daan lo in ngakai bomb an pauh ngaingai a si khalle vuakawthat rori cu a luar tuk lawmam. Curuangah KyawKyaw vuaktu zaten Daan vekin hremnak pek ding an si” tiah mipi lam in beiseinak nei in a au a si.

Leave a Reply

Your email address will not be published. Required fields are marked *