Mizoram ah Kawlrammi riitsii phur/zuar kaihmi an um hnihthum ruangah ralrin an pe

Kan unau Mizo pawl in raltlan dinhmun in duhsak zetih in zohkhen laiah raltlan lak ihsin riitsii phur/zuartu an um tiah thuthang a suak ruangah Chinram hriamkaibu 6 pawl cun cuvek thilsual tuah nawn lo dingin mipi ralrinpeknak thu an suah.

CNF/A, CNO/CNDF, HPO/CDF-Hualngoram, PDA, PDF-Kalay, ZFU/PDF Zoland tipawl in thu an suah khawm ih, Mizoram ih khawsa Kawlram raltlan pawl siseh, ramri ihsin riitsii thunluttu pawl ralrinpeknak thu an suah.

April 21 ni khenmi thusuah ahcun Kawlram raltlan pawl hrang theitawk suahin hmalaknak neitu Mizoram cozah siseh, biaknaklam pawlkom le NGO telin Mizo mipi hnen ah beu nak ding hmunhlum in pe mi par ah lungawithu an sim hmasa.

Apahnih nakah Kawlram ralkian pawl lak ihsin riitsii a darh timi thu ah poi an ti zet thu le cuvek sualnak tuahtu pawl cun bansan lohli dingin an dilngen.

Pathumnak ah cuvek thuhla um nawn lo dingin áš­an la cio dingin le riitsiit phur/zuartu pawl cu ziangtizawng khalin kham natsat an tum thu, thusuahmi ah an ngan tel.

Thusuahmi thawn pehparin Chin upa pakhat cun
“Mizoram ah riitsii phurlut le zuar ruangih kaih tuar Kawlrammi hi tuhlan ihsin an rak um phahphah.”

“Atu kan ram a buai hnu, raltlan dinhmun in Chin mipi tamzet Mizoram ah kan tlanlut hnu khalah riitsii thawn pehparin kaihkhih mi hnih-thum an um.”

“Tuvek kan dinhmun thawn cuvek thangsiatnak a um bet cu in duhsaktu kan unau Mizo pawl hmai ah mithmailo in kan um ih, atu ah kan rinsanmi kan ralkap pawl in mipi ralrin peknak le riitsii phur/zuartu pawl theitawk suahin kan kham ding an timi cu thuthang duhumtak a si” tiah a ti.

Leave a Reply

Your email address will not be published. Required fields are marked *