Mizo pai` Zawhte soisa That dan cu a rapthalk tuk ih Mipi in an ngaidam thei lo

Zawhte sa fir hmang, ar deh hmang tivek cu that awk sak a si ṭheu nan Mizo idol ih rak zuam dah Vanlalauva ih Zawhte soisa that dan cu a rapthlak tuk hlei ah video a record bet ruangah mi tamzet in an soisel ih NGO-PETA (People for the Ethical Treatment of Animals) hnen tiang report dingin le hremnak pe tengteng dingin dilngennak a um.

Zawhte a hrem lai cu video tawi pahnih a tuah. Pakhatnak ahcun zawhte pakhat zial ah a it ih a hnar thi thluh. A aw khal a suak lo ih a Lei khal ah thisen a um. Video a record lai cu Zawhte cun ṭhiṭha khalin a zoh ngam lo. Amit sir ten a bih phah rero. Second 30 sau a siih video a tawp zik lam ah “va thi lawlaw aw” ti`n a phun phah.

(Video na zoh thei lo le tangtabik ah a link kan ret)

Video pahnihnak khal second 30 sau a si ih cuih Zawhte cang thei nawnlo mi cu Sobul thawn a sut ciamco. A mei ah duh tawk in a sut cu a nat a tuar lo si ding, Zawhte cun a ke voikhat a hun thlir. Cuhnu ah a ke cu Sobul thawn a sut ciamco lala ih a ke hmuah a pensawl thluh. Video sung ih a lang dan ahcun nung dam ngaih nak um nawnlo ding khi a bang.

Cuih video tawi pahnih cu mipakhat in Facebook ah a thlah ih “ziang thlarau lawmlam in so a luh cilh ke. A rapthlak tuk. Hiti lawmam ih nunrawng cu a mah khal hi ṭih a nung ding ka zum. Rannung duhdawttu pawl ra suak hnik uh law. Himihi zohliam men ding a si lo. Rannung fingkhawitu PETA India NGO pawl ih hmu ding in rak share sawng uh” tiah ca a ngan.

Cuih video cu minung 200 luan in an share sawng ih comment nakah Zawhte soisatu cu an cam an riam.

Video cu mizo Facebook hmang pawl lakah a darh vivo ih a theiciangtu pawl in Zawhte thattu hi Mizo idol ih rak zuam dah Vanlalauva a si tiah an nem hnget.

A thuhla cu Facebook group ṭhenkhat ah an pholang ih “zawhte sual cu thah kel an si ko” titu khal an um. Mipakhat phei cun “kan khua (Bilkhawthlir khua) tlangval hlasak thiam awpa/pawr emem Tv Vanlalauva hi kan suanvawr zetmi a si. Tuṭum ah mihring thil sual tuah hmang vekmen lakih na cang sual pang ve mi hi kan nih na khuapii pawl cun kan lo ngaithiam emem a si. Tuhnu ahcun tuvek ih thilsual tuah nawnlo dingin na nun rem aw. Tuih vanduainak na tong mi pawl hi neh tengteng tum aw. Kan nih khalin thlacamnak thawn kan lo bawm” tiah group pakhat ah ca a thlah.

Cuih ca cun mipi a ti thinheng sinsin. Ca post tu riangri nasa zetin an hro, an mawhthluk ih “cuvek ih ngaithiam men ci a si lo. Zawhte ar deuh hmang tivek cu that keel a si ko. Nan, meithal tivek thawn kan kap that cih. Nan, Vanlalauva ih thil ti dan cu mi nunrawng pawl ih cangvaih dan a si. Serial killer pawl khal hivekin rannung hrem that thok in an mizia an ti lang thok. Mizo idol ih a rak tel dah nak le a rei tuk zo tikah hmin thang dan a hawl ih a tuah mi khal a si men thei. Asinan, cangvaidan hi ngaithiam theih a si lo. Hrem tengteng a ṭul mi a si” tiah mipakhat in cangantu riangri nun a sim.

Zawhte soisa thattu Vanlalauva hi a thil tuahmi ruangah Vairengte ah Thawng an thlak tiah miṭhenkhat in an ti nan Thawng an thlak taktak maw? Thlaklo timi cu kan nemhnget theilo a si.

VideoNunrawng Vanlalauva 1, Nunrawng Vanlalauva 2
***Ralrin peknak: A video hi a rapthalk tukih rannung ngainatu na si ahcun zoh lo mei aw***

Leave a Reply

Your email address will not be published. Required fields are marked *