Mizo DungTun Dahlotu Pu No Than Kap – Salai Chin

Myanmar ram Chin-Mizo ramkhel khawvel ah Pu No Than Kap hi a thei lotu kan tam zum a um lo. Kan duh, duh lo khalah Chin ramkhel thuhla kan rel ahcun a hmin telh ringring a ṭul. Cucu, CPP President le SCAM a rak ṭuan dah ruangah khal a si men thei.

Pu Than hin ramkhel khawvel phen ah Bible degree sang zet a nei ih hla phuah, cangan thiam a si hlei ah Theologian khal a si. Mi famkim cu a si lo nan rinsantlak patling pakhat a si.

Pachhunga University College suak a si bakah, CNF hruaitu a ṭuan lai 1988-1996 kum sungah Aizawl ih tlangleng a siih Mizoram mi hminthang tamzet ih rualṭha khal a si. Abikin Pu Zoramthanga thawn khal, rualṭha an si. Cucu, Mizo/Chin nunphung nuntu khawsakdan, an thlir dan a bangaw ruangah khal a si thei.

Pu Zorama leh Pu Than hin Zo hnahthlak tiih kan theih mi, Lusei, Lai, Mara, Paite (Zomi), Matu tvk hi hnam/miphun khat kan si nan Cozah pakhat hnuai ih kan um tlanglo ruangah le kan ṭong a bang aw lo ruangah pumkhat kan si theilo mi hi poi an ti zet.

Pu Zorama, Kawlram a tlawng lai ah Pu Than in vok a rak thah. Mizoram ah Chin National Day hmang dingin Pu Than an sawm lai ah khan, Pu Zorama in hluanghlai zetin a rak hmuak ih, a khual ṭha hlei ah a tlun nakding Helicopter khal a hlang sak. Pu Zorama lawng a si lo, Pu Hawla a tlawng ṭum khal ah Pu Than tong dingin appointment a rak tuah dah.

Pu Than hin Mizo/Lushei hi midangdang vekin a hmu ve lo. Sagaing Chin Affairs Minister a ṭuan lai ah Mizo Society hi titheitawk suah in a bawm ringring. An sawmnak tapiang in pelhloten a ṭanpi ringring. Thinlung te le ruahnak fate nei mi ṭhenkhat in an dodal lai khalah Chin Literature & Cultural Association ah Mizo palai a thun lut.

Amai phunhnampi in Mizo ṭong hmang pawl an dodal lai ah “Kan hnam hi Mupi mit vekin a sunglam in zoh hnik uh, Hmuan pakhat ih pangpar mawi ciitin par tlang vek an si. Kan mah le mah kan buai mi cu Kawl le Kala lungawi ternak men a si” a ti ṭheu. Voikhat khalah meeting nakah mi pakhat in Mizo sawisel in a ding lai cu “Mizoram hi Myanmar, Chin mi rilrawng ṭamsawl umnak neilo ih kan um lai ah rawl le beunak hmun in petu an si” tiah Pu Than cun a let.

Chin le Mizo pumkhat si dingin le Chin ram cak sinsin theinak dingah Chin Party pathum CPP, CNDP le CLD cu party pakhat ah fin a siih Chin National League for Democracy tiin hmin bun a si. CNLD cu Myanmar ramsung um Chin hnamtinkim ta a si. Kan zaten umkhawmnak party a siih Chin phun cii kim deuh thaw umnak khal a si.

Myanmar ih Chinmi tuarnak hi simcawkding a si lo. Hivek pawl nawr ding cun Chin party kan ṭan ṭul. Federal si lo in Democracy a si ringring ahcun, mitamsawn rorelnak a si ruangah buainak a tam sinsin ding. Curuangah mimal pianvo hum ding cun Federal kan mamawh. Cukhalcu Kawl pawl in, in pek dah lo ding. Kan mah rori`n kan nawr a ṭul.

Cuticun Myanmar ah hin kan sakhua, kan nunphung le kan sinak kan hum thei ding. Zungbawi hnaṭuan khalah kan mi le sa an pung vivo dingih sakhua lam ah kan zalen deuh ding. Kan ṭang khawm dingih kan tha a cak deuhdeuh ding. Cutin, tleunak cu thim lakin a hung tleu vivo ding. Mizoram khi State ih an cak ruangah Missionary khal tamtak an thlah thei. Curuangah miphun zawng ih cak ding hi a poimawh zet.

Mizo ṭong hmang Candidate kan neilo ruangah vote hlah uh kan ti lo lawlaw. Vote pek ding mi ah rem kan ti lo le hnam dang vote ai in kan mai` hnam Party CNLD candidate hi vote cio uh si.

(Chin Special Media Group ta let sal mi a si)
Cahram ngantu Salai Chin

Leave a Reply

Your email address will not be published. Required fields are marked *