Mithi zo i ruahmi Mang Suan Khai telin Insein thawnginn ih Chinmi ṭhenkhat an suah

Lamzawh duhphorh cangvaihnak ruangah March 3 ih kaihkhih tuar mitamzet cu March 24 zinglam nazi 10 hrawng ah Insein Thawnginn ihsin thalh suak an si tiah theih a si.

Cumi ah Tedim, Tonzang, Thantlang mino ṭhenkhat khal an tel tiah theih a siih mithi zo i ruahmi Mang Suan Khai khal a tel ve.

Insein Thawnginn ihsin March 24 zing ih thlah mi ah Chinmi Hau Deih Kim le Ma Swe Aye khal an tel

Anih Mang Suan Khai hi March 3 Yangon, N. Okkalar ah meithal kap a tuar hnu ah ralkap pawl in an kai mi a si.

Kaihkhih a tuar thu a sungte pawl in an thei veten an naivai Thawnginn le Siizung tintian ah an hawl nan an hmu thei lo.

March 6 ah a thi zo ti`n thuthang an dong ih a ruak hlam dingin Siizung lam an va pan nan a um nawn lo, an ur zo tiah an rak sim.

Cutin Mang Suan Khai cu a thi zo ah ruat in ruak um lo vui nak khal a sungte pawl in an nei zo nan March 24 zinglam ah Insein Thawnginn ihsin nungdam in a rak suak sal hi a si.

“Tuizing nazi 11 hrawngah inn a thlengih kan lungawi zet. A Kawng ah kah ngah a si ih an kaih hnu ah Siizung, Thawnginn tinkim ah kan hawl nan kan hmu lo. Cumi ah a ruang hmu loin midang in a thi tiah in simmi cu kan rak zum pang. Ralkap Siizung ah ret a rak si ih Thawnginn ralkap Siizung a thleng timi kan rak thei lo. Cumi tlunah ralkap Siizung cu zingzoi a har hrimhrim. Ka fapa rual in tuizing ah Insein thawnginn ih khummi 700 hrawng an thlah tiah kan thei. A kawng an kah ngahnak khal a hil cak tuk zo” a ti.

March 24 zing, Insein Thawnginn ihsin mitamzet an thlah thu ah “March 3 ih kaihkhih mi hmuahhmuah an thlah thluh. YBS motor 10 hrawng a si ding. Netalam ih thlah dingmi khal an um. Ziangtikah an thlah ding ti cu kan thei lo. Cun, an thlah mi cazin cu an mah thawn a pehtlaihnak palik zung lam ah vasut ṭul ding. Kan mah khalin a cekci kan thei lo. Amalbik Zateel cu an kim ding” tiah Lawyer pakhat in DVB hnen ah a sim.

Leave a Reply

Your email address will not be published. Required fields are marked *