Mipi Lung buaiter deuh tu CNA thusuah simfiahnak

Min Aung Hlaing in remdiahnak thu reltlang dingin Tlangpar hriamkai hruaitu pawl a sawm mi thu ah Chin National Front in May 6 ah theihternak capi an suah ve.

Thusuahmi ah ramkhel phungdan vekin remdiahnak tuah an duh thu siseh, remdiahnak thurel nakah a teltu ding hmuahhmuah kim thluh in le ramdang/ramleng pawlkom picang theihpitnak thawn a dikmi remdaihnak tuah an duh thu tarlang a si ih, a neetnak ah CNA cun mipi duhnak thlunin mipi lam ah kan ṭang hrih ding tiah an tarlang.

CNA thusuahmi par ah hmuh dan dangdang a um ih miṭhen cun Min Aung Hlaing sawmnak kan cohlang tithawn a bangaw ko an ti lai ah mihrekkhat in fiangfaiten thu an suah lo. A remcang cun kan cohlang ding ti thawn a bangaw an ti ve thung.

Hih thuthawn pehparin kum 10 lenglo ramkhel khawvel ih rak tlangleng vetu Salai ZCL cun hitin a sim fiang.

Min Aung Hlaing in Dothlengnak luban a simi CRPH, NUG le PDF/CDF ralkap pawl tel loin Tlangpar hriamkai hruaitu pawl cu April 22 ah remdaihnak thu reltlang dingin a sawm hai ih, amah rori thawn tongaw dingin May 9 tiang hmin pek caan a pe hai.

“CNA thusuah cu mipi duh dan kan thlun ding ti thawn a bangaw. Mipi cun remdaihnak an duh rualin ralhraang uknak hnuai ih um an duh lo ti cu kan thei tlangpi. A olzawng in sim men seh la doawknak tawp terin Min Aung Hlaing in lalnak tohkham tilawng sehla, mipi duhmi hruaitu pawl in rampi ukhruai sehla,,, cumicu mipi duh mi a si.”

“Asinan Min Aung Hlaing cun cuih zin a zawh tum lo. Mipi duhmi NUG cozah le a ralkap pawl hnongin Tlangpar hriamkai pawl lawng remdaihnak tuah dingin a sawm.”

“Cuti a si tikah MAH ih remdaihnak thurel tummi le mipi duhdan a kalhaw. CNA in mipi lam ah hnget zetin kan ding an timi cu Min Aung Hlaing sawmnak kan cohlang lo ti thawn a bangaw. Ruatbuaiding zianghman a um lo.”

“Cun, thu an suah dan a ciang lo titu hrangah hitin ka rel duh. An thu suah mi kha ramkhelnak thawn pehparih thusuahdan keelte a si ko.”

“KNPP, KNU le KIO thusuahdan thawn a bangaw thluh mi a si. An nih khalin remdaihnak an duh thu an tarlang ko. Nan, Ramkhel phungdan pangaiten le a tel dingmi pawlkom tinkim an tel lo cun MAH sawmnak kan cohlang lo an ti thluh mi a si.” (Opinion)

Min Aung Hlaing letnak CNA thusuah

Leave a Reply

Your email address will not be published. Required fields are marked *