Mipi kan dinhmun le Ralkap lam dinhmun – Saya James Thang

“Buainak lam kan pan sinsinding a bang”

Kan Rampi buainak thu thawn pehpar in keimah ten hitin duhthu ka rak sam. “Ralkappawl in kan ti sualpang tiin Mipi hnen ngaithiam dil inle 2020 Election result kha pompi sal in Daw Aungsan Suhkyi le President U Win Myint tel in an kai mi zaten thlah ṭheh sal sehla Daw Aungsan Suh Kyi hoha mi NLD Cozah khal cun Ralkap pawl an thil tisualmi ngaidam inle daan vekin Cozah kut hnuai ah um tir in an barrack ah thlung tir sehla Ram hrang a va ṭha ding ve” tiah duhthu ka sam rero nan ka duh thusam mi le a kim thei ding a banglo ih kan Ram cu buainak lam kan pan sinsinding a bang.

Ralkap lam nih tita cengmang ti ah neh daanding a phunphun hawl in a neihmi hriamhrei ṭhaṭha hmangin neh tum in ṭan an lak ding vekin Mipi lam khal nih neh tengteng ding ah an neihsun hriamhrei suah in a phunphun in ṭan an lak ve ding ticu a fiang. Nikhat hnu Nikhat a buai sinsin ding ih Ralkap lam khal in Martial law ( စစ်အုပ်ချုပ်ရေး) an puang leh ding zum a um.

Ralkap lam din hmun
Ralkap din hmun cu nikhat hnu nikhat a sia vivo. Aana an ting ve ten 1988 buailai vekin Mipipawl cu ṭih dingin Kap, kai, hrem ih awlaiten neh zetih ukbet le 1958 ih အိမ်စောင့်အစိုးရ vekin Rampi kai hruai a tum mi a sinan Mipi an fimtuk zo ih a tumvekin a hlawhtling theilo. An ruat baanlomi CDM cangvaih nak an tong ih an kham theilo.

Leitlun Ramkip nihle Cozah ah an pomlo hlei ah Ramdang ihsin Kawlram ah Investment tuahtu Company tumpi 57 lenglo le Ramsung Company tumbikpawl Kanbawza telin Company 100 lenglo nih Ralkap thawn hnattuantlang an tumlo thu an puang ih Bankpawl khal an khar ttheptthep. Rampi Central Bank ah le Poisa a um lo ti a si. Ramdang ih ummi poisa le piakhat hman an suah thei lo.

Ramsung hriamhrei kaipawl inle Cozah ah an pom ve lo ih KIA le KNU cun kap an thok rero zo. Cozah hnattuanpawl ih CDM le a cak sinsin vekin GZ pawl an phur sinsin ih sandahpiah a kham thei nawnlo. Ralkap cun Plan A,B, C tiang a nei ti a si ih plan B nak Martial law (စစ်အုပ်ချုပ်ရေး) a puang men thei tiah thu a leng. Martial law an puang le tuhnak in Ralkap an cian sinsin dingih mithi khal an tam sinsin ding.

Kawlram khua tamsawn Sizung ah Ralkap pawl cun Minapawl lohtheihlo in an dawisuak ih Tlawng inn thawn a pahnih in um hmun an khuar. A san cu Martial law a puang tum ruang ah (or) USA nih Vanzam thawn kap ding an phang ruang ah an relh a si ding tiah zumhmangin an rel.(International law ah Sizung le Tlawng inn kaplo ding tin a um). An rinsanmi China le Russia inle an phatsan vivo thlang. Ralkap hrang ahcun an hmaikhua a pit vivo ih an hrang ah awloksong za cu a si ko. Asinan dungsip cu an tum lo.

Mipi lam din hmun.
Mipi lam din hmun hi a ṭha sinsin. UNSC cun Ralkap pawl tlun ah China le Russia ruang ah napin demnak Ca a suahlo nan Ralkap pawl ih cangvai daan ṭha an tilo thu le an kaimipawl suahsal dingin Ca cu veihnih tiang a suah zo. Ramsung ah CRPH nih napin ṭan a lak vek in ramleng ah Dr Sasa te pawl in napin ṭan an lak ih an thiltuahmi a tluang vivo.

Leitlun Ram tam sawn nih CRPH an pom ih Ralkap an dem. CRPH cu a cak sinsin ih alang Cozah a din ih alang President khal a khant zo. Reihlan ah Federal Democracy Daan hrampi tuah inle Cozah thar dinih Federal Ralkap nei dingah a cangvai rero.

Mipi lam khalin Ralkap pawl ih an duhduh ih that le kai le thawi tuarlo dingin mah le neihmi hriamhrei thawn mah le mah humhim aw ding ah an ready zo ih CRPH khal cun mah le mah humhim theinak ca official in a suah zo. CDM cangvainak a cak sinsin ih Palik CDM lut khal an tam sinsin. Mipi an cak le Ralkap lam khal in CDM an lut leh ding zum a um. Nehnak cu Mipi lam nih a co hrimhrim ding.

USA, UK, Japan, Singapore le a dang rampawl nih Kawlram ih um an mipipawl mah le ram ah an hruai tlung rero zo ih Kawlram sung ah Kap le do awnak a suak men thei tiah Kawlram a thlirtupawl cun an zum. Kawlram Democracy pitling ngahnak ding ah Thinsen luang cu a ṭul ko hmang.

Mipi kan zaten Pathian rinsan le thlacamnak thawn lungrual zetin ttangtlang uh si. Pathian kan lam ah a ṭang. Kan neh tengteng ding.
အရေးတော်ပုံ မုချအောင်ရမည်။

Leave a Reply

Your email address will not be published. Required fields are marked *