Mipi in kan theih ṭul mi MP Hnaṭuan, Sinak le Thil Ti Theinak

Hlutdaw hi Pyidaungsuh Hlutdaw le Pyine Hlutdaw tin phun 2 in kan zoh pei

Pyidaungsuh Hlutdaw cu Pyituh Hlutdaw le Amyota Hlutdaw pahnih kom ih dinmi a si. Rampi huap hrangah Daan tuahtu bupi a si. Pyituh Hlutdaw hi kum 25 kim cun ṭuan theih a si ih Amyota Hlutdaw cu kum 30 kim a ṭul. Pyine Hlutdaw khal kum 25 kim cun ṭuan theih a si. Hlutdaw Palai pawl ih an ṭuanvo tumbik cu Daan tuah hi a si.

Pyine Hlutdaw Palai thu thawn pehpar in kan zoh hmaisa pei

Pyine Hlutdaw hi palai 24 in din a si ih Peng pakhat ah palai 2 ciar thlah ding a si ih palai 18 an suak ding. Cule ralkap palai 6 an tel ve ding. Mipi in 18 kan hril dingih hril loin anmahte ra tel pawl ralkap palai 6 thawn 24 an si ding.

Pyine Hlutdaw ih Daan tuah theinak cu 2008 Daanhrampi caang 188 ah hitin a um.
Pyine Hlutdaw in 2008 Daanhrampi schedule 2-nak vekin Ramkulh huap in siseh, hmun pakhat huap in siseh Daan a tuah thei ti a si. (USDP cozah san 2015 ah himi Schedule hi tampi an bet) Pyine Hlutdaw ih tuah theimi pawl kha bikhiah cia thluh a si. Ramkulh huap in Daan a tuah thei lengah ramkulh sung ih hmun pakhat hrang khal Daan a tuah thei. Hmun pakhat hrang timi cu Falam peng hrang lawngah Daan a tuahsak thei ih Khawte pakhat hrang lawng khalah a tuah thei tinak a si.

Pyine Hlutdaw palai pawl ih an ṭuanvo cu –

-Daanhrampi le hmang laimi Daan pawl kilkhawi ding
-Rampi thawn a pehpar awmi thuthup pawl kilkhawi ding.
-Hlutdaw ih thunlutmi Daan a hran pawl/thuburmi pawl thawn pehpar in thu a rel tikah mipi hlawknak kha thupi ah a ret ding
-Rammi pawl ih covo an ngah theinak kha thupi in a ṭuan ding
-Hrilfung hmun hrang le rampi ṭhansonak hrangah Daanhrampi kalh loin a pehparmi thuneituzung lam pawl thawn siseh, thuneitu pawl thawn siseh peh aw ton in hnaṭuan ding
-Hrinfung hmun mipi pawl hnen ah hlutdaw ih tonteh pawl a simfing ding
-Hrilfung hmun mipi ih simmi pawl thawn pehpar in hlutdaw ah thusuhnak a tuah ding
-Hlutdaw ih pekmi a dang hnaṭuan pawl a ṭuan ding.

Pyine Hlutdaw palai pawl ih thil ti theinak pawl cu –

-Daanhrampi thawn rem aw in Daan a hran pawl a thulut ding
-Hlutdaw hotu siannak vekin thu bur le thu suhnak a tuah ding
-Hlutdaw ih a relmi thawn pehpar in a pehparmi ramkulh dinhmun zung lam le zung upa pawl hnen ihsin thu a theih duhmi pawl a sut thei, a rel thei ih thuhla a la thei
-Daanhrampi le ramkulh hlutdaw daan thawn rem aw in zalen zet in thu rel thei in hrilfung a pe thei
-Hlutdaw Ta-ba-pa-dih ah siseh, hlutdaw hotu ah seseh, hlutdaw hotu sangtu ah siseh hriltlin thei a si ih cawh a duh cun cawlh theinak khal a nei
-Hlutdaw ih dinmi pawlkom ah a tel thei ih cawlh a duh cun a cawl thei
-Hlutdaw palai sinak khalin a cawl thei
-Hlutdaw thurelnak ah mipi pawl in ra zingzoi (zoh) dingin Hlutdaw hotu siannak in mi a sawm thei.
Cupawl cu Ramkulh Hlutdaw palai pawl ih ṭuanvo le thil ti theinak pawl an si.

Hlutdaw palai pawl in a tanglam nunzia le ziafel (sikaan) an thlun ding.

-Ramdinkhawm ṭhenṭhek lo dingin, ramhrin miphun rualremnak ṭhenṭhek lo dingin, thuneihnak hnget dingin thlun ih kilkhawi ding.
-Daanhrampi, hlutdaw daan le hmang laimi Daan pawl thlun ih kilkhawi ding.
-Hlutdaw palai sinak vekih pekmi hnaṭuan pawl le thuneihnak pawl kha dik loin mai bulpak hrang hawlnak, eiruk hawlnak le ṭihtheihnak pawl hrangah hmang lo ding.
-Hlutdaw palai sinak thawn remaw in umdan, ṭongdan thiam ding.
-Hlutdaw palai hnaṭuan kha felfai zetin a ṭuan ding.

Hlutdaw palai ih ngah theimi le canvo pawl cu a tanglam vekin an si

-Hlutdaw le hlutdaw committee pawl hnen ih a simmi thuhla thawn pehpar in hlutdaw Daan siar lo, Daan dang ih mawh peknak ihsin awlh a si ding.
-Bikhiahmi lawm man, khualtlawn man, nihlawh man le a dang man pawl a ngah ding.
-Hlutdaw meeting a kai lai ah ahlan in Hlutdaw hotu siannak a um lo a si ahcun Kaih thei an si lo, thuṭhen zung in theihpitu dingih kawh ding khalah awlh a si ding.
-Hlutdaw committee meeting pakhatkhat a kai lai ah hotu siannak a um lo a si ahcun Kaih thei a si lo.
-Sualnak pakhatkhat ruangih kaih a si hman ah hlutdaw hotu siannak thawn mawh pek a si hlan cu hlutdaw meeting a kai thei.
-Hlutdaw palai in a hrilfung hmun ih bial a fang tikah amahte in a ṭulmi a timtuah ih bawm ṭul a si ahcun thuneitu hnen ah a sim thei ih hminnak hrang thlun ṭul a si khal le thuneitu hnen ah a dil thei.
-Cule ramdinkhawm hlutdaw ih pekmi kum tin ṭhansonak budget khal hrilfung hmun mipi thawn relkhawm in bikhiah pekmi an hmang thei.

Salai Thawngpi (Ramthlo)
via
Chinland Herald Daily News

Leave a Reply

Your email address will not be published. Required fields are marked *

error: hahahahahaha !!