Mino pahnih kai dingin Falam palik in thu an suah

Falam lamzawh duhphorhnak le Dothleng cangvaihnak ih hotu lam pahnih a simi Salai Biak Lian Sang le Salai David New te pahnih cu an hmin le zuk tarlang in Falam palik in kai dingin thu an suah.

Falam palik in pukmah 505 (a) thawn an khingmi Falam mino pahnih an um tiah March 12 ah thuthang a suak zo nan zopawl an si ticu tarlang a si lo ih, tuisun March 15 ah an hmin le zuk pawl tarlang in Falam palik in kai an tum thu tlangthannak an nei hi a si.

Kai ding an timi Falam Mino hruaitu pahnih hi ram le miphun hrang ah pumpeaw zettu an siih Salai Biak Lian Sang cu atufang ah Falam Mino Pawlkom hruaitu a si. Daivd New khal Falam khawpi ih CNLD Youth Party sungṭuan a si ih Falam palik in kai dingin an hmin le zuk an tarlang hnu March 15 zaanlam nazi 6 tiang cu kaihkhih an si hrih lo tiah thuthang kan dong.

Falam mino pakhat cun “kan dung zarh lam ah Falam palik lam in hruaitu mino 2 kai dingin thu an than zo nan an hmin le zuk pawl cu March 15 lawngah an tarlang.”

“An nih hi kan rinsan zetmi hruaitu pahnih an si ih pum an peaw nak ruangah tuvek dinhmun an thleng hi mipi lam khalin theitawk suah in kan ṭanpi a ṭul. Kaihkhih an silo nak dingah thei tawk suahin kan humhim a ṭul” a ti.

Falam ih lamzawh duhphorhnak le Dothleng cangvaihnak ah hin pukmah 505 (a) thawn mi 3 kaihkhih an si zo ih court lam khalah voi 3 suahpi an si zo.

Leave a Reply

Your email address will not be published. Required fields are marked *