Mindat Doawknak ah SAC ralkap 20 an thi zo (UPDATE)

Thlanglam Laitlang, Mindat ih ralkap ukhruainak dotu mipi le SAC ralkap cu April 24 ihsin an kapaw thok tiah theih a si ih nithum sungah ralhraang minung 20 hrawng an thi zo tiah ramsung rintlak media ṭhenkhat in an tarlang.

April 24 ah SAC ralkap in Mindat mino 7 an kai ih kut thlak in an hrem hnu ah Pakokku lam ih kuat an tum bet ruangah mipi le SAC ralkap lakah kahawknak a suak thokmi a si tiah khuami pawl relnak thawng in theih a si.

Khuami hminthup mipakhat cun “kan thei tawkin tuhrihtiangah mipi lam in mithi an um hrih lo. SAC ralkap lam ah mithi khal an um ih hlimtuar khal an um. Tuizaan nazi 7 hnu hrawng ahcun doawknak cawl a si hrih” tiah RFA hnen ah a sim.

April 24 zaan ih SAC ralkap le mipi kapaw thok thu ah “Mindat mipi humtu ralkap in khuasungmi nan kai pang cun kan lo kap ding tiah thuthannak kan nei cia. Cuti cingin mino 7 an kai ih an thlah tumlo ruangah kan kapaw thok” tikhalin a sim hrih.

April 24, zaan nazi 9 hrawngih SAC ralkap le Mindat mipi kapaw nakah kaphnih lam in mithi an um lo. SAC ralkap lam ah hliamhma tuar an um ih ralkap in mipi lam mipathum an kai.

April 25 ah an kapaw betih Chin Human Rights Organization tarlang mivek a si le April 25 ih kahawk nakah SAC ralkap lam in mithi 3 an um. Tuizaanlam, April 26, zaanlam nazi 3 luan hrawng khalah SAC ralkap le Mindat mipi an kapaw sal.

Mipi nuai tumin SAC ralkap in khua dang ta ralkap bawmtuding an thlah bet cu lamziin lailakin an rinlo lai ah Mindat mipi sawn in an rak ciil ih ralkap motor 2 le palik motor 1 an urkang sak. Cumi ah ralkap lam minung 10 hnak ih tam an thi tiah theih a si ih Chin Human Rights Organization cun “khuasung ih an kap thatmi le lamziin lailak ih an rak nuai nakah SAC ralkap 15 hnak ih tam an thi” tiah a tarlang.

April 24 in 26 tiangih SAC ralkap le Mindat mipi doawknak ah ralkap lam in minung 20 hrawng an thi tiah theih a si nan an mah ralkap cun thuthang zianghman an suah duh lo.

Tuhrihtiangah mipi lam ih thi an um le umlo cu thufelfai theih a si hrih lo ih, tui` dinhmun ah kaphnih lam in dungsiiptum an um hrih lo tiah theih a si.

Leave a Reply

Your email address will not be published. Required fields are marked *