Mindat boruak Sosang sinsin, Mipi dinhmun ṭha lo

Chin ramkulh, Mindat khuapi cu SAC ralkap in May 15 zinglam nazi 6 hrawngin Lei par in siseh van par khalin an kap nasa ih dinhmun ṭhalo zetin an um.

Tatyin 274 in Lei par in nasa zetin an kap ih Helicopter khalin Mindat thawn peng 14 hlatnak ah bomb 2 an thlak hleiah Sanminthiri pura kiangah bomb 3 an thlak tiah ramsung media ṭhenkhat in an tarlang.

Khuami mipakhat cun “hmun 3 rorin kahdo kan si. Tudinhmun khalah kaihkhih tuar mipi 15 hrawng ralkham ah hmangin khuapi sunglam an ra pan vivo. Mitamzet cu hmunhim ah tlan theilo in khuasung ah kan tar. Mubur um ding tiih an zum deuh nak le meithal thawn an kap rero tikah mah le inn cio ih relh ṭul dinhmun kan si” a ti.

SAC ralkap in hmunhla kahnak ralthuamtum le meithal phunphun hmangin kahdonak an nei rero tikah khuami pawl cu leng khal suak ngam loin innsung ah an relh thluh.

May 14, mizaan lam in Mindat khua hmunhma umdan cu Helicopter in siseh van par ihsin thlingthlanak ih an hman ṭheu mi Drone vanzamte khalin siseh SAC ralkap in boruak cuannak an rak nei rero zo.

CDF – Mindat le SAC ralkap cu kahdocawlh thutiam ṭhiatbal in May 12 in an kapaw thok.

May 13 ah Mindat khua cu ralbawi bulpak ukhruainak hnuai ih um dingin SAC ralkap in Martial Law an phuang ih cuih ni in kaphnih karlak ah boruak a sosang sinsin.

Tui dinhmun ah mipi lam ih mithi, hliamtuar umzat le SAC ralkap dinhmun cipciar in theih a si lo nan a fiang zetmi pakhat cu Mindat khuapi an him lo ti hi a si.

Leave a Reply

Your email address will not be published. Required fields are marked *