Mindat boruak sosang, SAC ralkap hmai an nor vivo ih khuasung an neih thlang

Nilitnak Mindat doawknak cu boruak sosangzet si in theih a si ih SAC ralkap thazang tamzet in khuasunglam neih vivo in hmai an nor rero tiah theih a si.

Mizaanlam, SAC ralkap in ralkap thazang dang an kuat mi cu Mindat thawn peng 12 hrawng hlatnak Htinchawng ah mipi thawn nazetin an kap aw.

Tuizing, April 27, zing nazi 9 hrawngin kahdonak an ṭan ih SAC ralkap ih bomb den mi cun Htinchawng khua inn ṭhenkhat a ti kang tiah khuami pawl in an rel.

Mizaan lam ih Kalay, Gangaw, Pakokku ralkap thazang dang kuat tharmi pawl cun Mindat khuasung lut thei dingin hmai an nor vivo ih mipi lam (Chinland Defense Force – Mindat) khalin an khuapi hum tumin neihsun hriamhrei thazang thawn atu ah an do let rero tiah theih a si.

Mindat mipi le SAC ralkap cu a khaatkhaat in April 24 zaan in an kapaw thok ih nithumnak April 26 tiangah mipi lam in SAC ralkap 20 hrawng an that zo tiah CHRO in a tarlang.

April 26 zaan nazi 7 luan hrawngin kahawknak thawm a dai lawh ih April 27 zinglam nazi 9 hrawngin SAC ralkap thazang thar kuat bet mi le Mindat mipi an kapaw sal hi a si. Tuhrihtiangah kaphnih lam ih mithi, hliamhma tuar umzat cu thufelfai a suak hrih lo.

April 27, zaanlamri ih thunet suakmi ahcun SAC ralkap in hmai an nor vivo tiah theih a si ih Mindat khuasung lam an neih vivo ruangah khuami tamzet cun Mindat suahsan in hmunhim ah beunak an hawl tiah theih a si.

Leave a Reply

Your email address will not be published. Required fields are marked *