Mindat Mipi in Ralkap an neh suak thei dan cu hitin an sim fiang

Mindat doawknak ih hriamhrei ralthuam nei ṭha sawn SAC ralkap riangri natukih an tuar cu Myanmar mipi an mangbang thluh.

April 24 in an doawk thok ih Chinland Defense Force – Mindat ca suah mi vek a si le April 28 tiangah SAC ralkap 20 hnakih tam an thi zo.

Ziangruangah SAC ralkap an tuar na?

Boruak thlirtu pawl cun “Tuṭum ramsung kahawknak tamsawn cu SAC ralkap lam an cangvai hmasa ṭheu. Cuvek a si tikah mipi lamin voilehkhatih do ding an zum lo ruangah sibikin a lang. Cun, hmunram an thei ruang khalah a si thei ih timlamnak an nei cia mi le ralṭha zetih hmai an nor ngam mi hin tamzet a bawm ding zum a um” tiah an ti.

SAC ralkap dotu lakih telve mipakhat khalin “mah le mah zumawnak/rinawknak kan nei. Adikmi lam ih ṭangmi kan si ti kan thei tikah thih ngam rorin kan do ngam. Cun, hmunram umdan khal kan thei ih kan lungrual fawn. Cule ralthuam hriamhrei neihmi a thlauaw zia kan thei ciang ih hmaton in kan do duh lo. ပြောက်ကျားစနစ် kan hmang ih kan kap hnu, in kap man hlan ah kan hrial lohli. Curuangah hmaisabik ah neh nak kan co ti`n kan hmu” a ti.

An kapaw thok dan

April 24 ah ralkap ukhruai duhlonak langterin khuasung ih zuk/ca ben mino 7 cu SAC ralkap in an kai. Thlah lohli dingih mipi dilngennak an cohlang lo ruangah doawknak a suak thokmi a si.

Khuami mipakhat cun “hmaisalam ahcun kaphnih theihthiamawton in thu kan rel rem nan netalam in lamzawh in kham ih kan mino hruaitu tiang warrant an suah. Cuih tlun ah NUG cozah kan cohlang timi langterin khuasung ih zuk bentu mino 7 an kai. Thlahzalen dingin kan dil nan thlah an tum lo. Anmah lamin in ngair hmaisa ruangah doawknak a ṭan mi a si” a ti.

SAC ralkap lam cun kan thlah sal ding ti`n mipi an bumkual lawk ih mipi ṭhih in khuasung motor cycle to lai mipahnih an kap hmasa. Cutin April 24 zaan in Mindat ah doawknak a thok.

April 25 ah buainak dang a um hran lo nan kaphnih in timlamnak an nei veve ih April 26 ahcun CDF-Mindat in SAC ralkap an nuai thok.

Lamziin lailak in CiilNuai an tuar
Khuadang ralkap an cah bet ding tiah zumnak a um cia ih Pakokku lam ih ra ralkap motor cu Mindat khualuhnak Golf bualrawn kiangin an rak bawh cia ih an ciilnuai nakah SAC lam ralkap thi, hliamhma tuar an um tlun ah an motor khal a kaang.

Matupi ihsi ra mi ralkap motor pathum khal Mindat thlen hlan peng 30 hrawngah CDF-Mindat le khuami pawl in an rak ciilnuai. Dung-hmai in an naui ih hmai khal nor theilo dung khal siip thei loin an tartahaak. Cumi ah amalbik SAC ralkap 10 an thi tiah theih a si ih Chin Human Rights Organization (CHRO) cun 15 hnakih mallo an thi tiah ca an suah.

SAC ralkap lam cun Mindat Golf bualrawn kiang ih ciilnuai an tuar thu cu thuthang ca ah an suah nan peng 30 hlat ih ciilnuai an tuar thu cu an ngan tel lo.

Kapawknak cawl lawk dingin SAC ralkap in zangfah an dil

April 27 zing ah SAC ralkap lam in RPG le meithaltum phunphun thawn mipi` ralkhambuuk an kap thok. Ralthuam hmanmi thlauawtuk ruangah le nunnak liam lak men phang ah nazi 10 hrawng ah mipi lam dung an siip.

Khuami pakhat cun “Meithal hmanmi thlauawtuk ruangah mipi lam dung kan siip. Lolakmen ih tuar ding kan duh lo. Cun, an mah lam ralkap 30 kan ceepbetmi hrang an thla phang deuh siding. SAC ralkap lam in biakaw dingin kut in hlan” a ti.

An dawraw suak lo

Kaphnih biakawnakin April 27 zaanlam ah kahawknak an cawl lawk. Nan, an karlak thurel a rem theilo. Mipi lam cun tubai ih kaihkhih tuar mino 7 le hlanta mi panga thlah dingin le SAC ralkap dungsiip dingin an dilngen. Nan, ralkap lam cun mi 7 thlah ding lawng kan lungkim tiah an let sal.

Ralkap lam khalin mipi` reetbeetmi ralkap 30 luatter dingin an dilngen ih kaihkhih tuar mi 7 le ralkap 30 thlengaw an beisei. Nan, mipi lam cun ralkap 12 lawng kan luatter thei tiah an let ve.

Zolam thlah hmaisa ding timi ah mipi lam in an milai 12 thlah hmaisa an beisei. Ralkap lam khalin ralkap 30 thlah hmaisa dingin an beiseive thung. Nan, mipi lam cun Tahan ṭum ih ralkap mizia an thei ciang ruangah ralkap duhthlun an tum lo.

“Ralkap 30 kan ceeptarmi le tatyin 247 ih ralbawi thlengaw dingin thu kan dong. Thluak an hmang tum khal si thei ih, cumi ralbawi cu kan kut ih um ralkap 30 lakah a rak telziar khal si thei. Ahrimhrim ah ralkap rank niam hrangah ralbawi apaw tivek a um dah keel lo. Kan nih lam cun kan milai 12 suah ding kan beisei. Nan an nih lam cun 7 lawng thlah in ralkap 30 thawn thlengaw an beisei. Curuangah a awmanglo tiah ruahnak kan nei ih biakaw tluanglo dinhmun vek cu kan si” tiah khuami pakhat in BBC hnen ah a sim.

Tufang Mindat dinhmun cu a sosang zet lai tisehla a sual lo ding. SAC ralkap lam in mipi kut ih um an ralkap 30 cu an zoh liam men lo ding. Mipi lam khalin ralkap kut tuar men duhlo in an do let tengteng ding. (BBC)

Thubet : April 27 zaan ah SAC ralkap in mino 7 an thlah tiah theih a si.

Leave a Reply

Your email address will not be published. Required fields are marked *