Mindat-Matupi zinpi ah ni 3 zon in SAC ralhraang le CDF an kap aw

Tuni, May 2 zinglam ah Chin ramkulh, Mindat-Matupi zin ah ralhraang SAC ralkap le mipi humtu ralkap pawl nasaten an kapaw.

Matupi ihsin Mindat lam pantu SAC ralhraang mawṭawtlar le lamzin sialsaktu pawl cu April 30 ihsin CDF Mindat in an rak kap ih tuzing khalah an kapaw bet tiah theih a si.

Mindat CDF ṭuanvonei mipakhat cun “Tuzing ah ralhraang ralkap 5 an thi. Peng ban 50-60 karlak hrawngah a si. Ralhraang lam mi 5 an thi ih hriam tuar an tam. Thuthang kan ngah dan ah ralhraang pawl dunglam ihsin an kap ti`n kan thei” a ti.

April 30 le May 1 khalah an kapaw ih ralhraang lam mithi um zet cu cipciar in theih a si lo nan mithi an tam thei tiah ruah a si.

Ralkap thazangthar kuattu ralhraang mawṭawtlar cu Matupi ihsin April 27 ah an poksuak ih khawleng an thlen veten Matupi CDF in an rak kap cih.

Lamzintluan ah doawknak a um phah vivo ih Mindat peng an thlen khalah CDF Mindat in lamlak ihsin an rak kap ih, tu dinhmun ah Mindat-Matupi zinpi boruak a sosang zet tiah theih a si.

Leave a Reply

Your email address will not be published. Required fields are marked *