Mindat inṭanpi ṭul, kan thutiam nan hngilh maw si – CDF Mindat

May 12 ihsin SAC ralkap thawn kapaw saltu CDF Mindat cun Chinram khua dang ih ṭanpinak an ṭul thu an rel suak.

SAC ralkap le CDF Mindat karlak kahdocawlh thutiam an nei mi cu May 12 ah ṭhiatbal in kapaw thoksal a si ih tuhrihtiang thuthang suakmi ah CDF Mindat lam in hliam tuar 4 le nunnak liam 1 an um zo tiah theih a si.

Mindat CDF ṭuanvonei mipakhat cun “tuizing nazi 6 hrawngin Kyaukhtu vanzam tualrawn in phukpi ralthuam hmangin inkap ciamco ih kan nunnak thaap in Mindat khuapi kan hum. Khuasung cu an kap hrih lo ih kan umnak kiangkap nasaten in kap. Minute 3 dan in inkap” a ti.

SAC ralkap in phukpi ralthuam thawn an kah nakah mipi humtu CDF Mindat ralkap 1 nunnak liam in mi 4 hliam an tuar tiah theih a si ih, Kyaukhtu myo ah ralkap mawṭaw 3 thleng bet in, 2 cun Mindat lam an pan tiah theih a si.

Cuvek dinhmun a si tikah Mindat CDF ṭuanvonei mipakhat cun “ziangruangah kan rualin tutiang an cangvai hrih lo. Kan zaten ṭangrual in kan cangvai tlang ding ticingin khua dang pawl ziang ruangah an cangvai hrih lo” a ti.

SAC ralkap le CDF Mindat cu kapawlo dingin thutiam an nei nan SAC lamin thutiam pahbalin kaihkhihmi mipanga an thlah duhlo ruangah May 12 ah kahdonak an ṭan salmi a si.

April thla tawp lam khalah CDF Mindat dilngenmi ngaihsaklo ruangah kahdonak a rak suak dah ih cuih ṭum ah SAC ralkap 20 luan an thi tiah CDF Mindat in an phuang.

Leave a Reply

Your email address will not be published. Required fields are marked *