Mindat : Ṭumhnih Kahdonak ah Mipi lam in Nunnak liam 2 an um zo

Mindat Chinland Defense Force le SAC ralkap ṭumhnih kahdonak an ṭan hnu May 12 ihsin tuini May 14 tiangah Mindat mipi lam in nunnak liam 2 an um zo.

May 13 ah Mindat thawn peng 18 hrawng hlatnak Kyaukhtuh khua lam in SAC ralkap in Phukpi hmangin CDF Mindat umnak hmun an kap ruangah kum 18 mi Salai Thang Ghung Thang nunnak a liam ih mipali hliam an tuar.

Tuisun, May 14 khalah Electric zung ih hnaṭuan Assistant Engineer Ko Wai Phyo Thanh cu meithal hliam tuar in a nunnak a liam tiah theih a si.

Tudinhmun ah Mindat khua cu boruak sosang zetin a lang ih zinglam in an kapaw thok rero zo.

Zinglam 10 hrawng ah CDF Mindat in lamlak in ralkap mawṭaw an rak kap ih mawṭaw 6 an urkaang sak.

Sunhnu lam ah SAC ralkap in Sniper le meithal tum hmangin an kap sal ruangah CDF Mindat cu dinhmun ṭhalo zetin a um tiah theih a si ih, cuhnu ah Naypyidaw lam ihsin helicopter 2 a thleng bet tiah theih a si.

Tu dinhmun vek a si ahcun kap hnih lam in nunnak liam um bet thei rero dinhmun a si ih thuthang um dan ih zirin theihternak kan nei pehzom vivo ding.

Leave a Reply

Your email address will not be published. Required fields are marked *