Mihlo Update : Kawl te in An hmu nan, zo a si ti an theilo ruangah An zoh liam men

Falam, Pathangkhan tangtazin ih um Pa Lal Thawm Lian (kum 38) cu an tuamhlawmank Mandalay siizung ihsin August 7, 2020 zaanlam nazi 3 hrawng ah a hlo ih, a hloh hnu nikhat rei ah Mandalay khuasung ah voikhat an hmu nan theihthiamawlonak ruangah an sim theiaw manlo.

Pa Thawm cu bahkhawnnak ruangah a Lu, a Ke a khawngaw hlei ah a el ruh a pelh. A Lu khawng nadeuh ruangah nikhua thei loin a um lawk ih a thluak lam a thamban sipangah ti`n Falam in Hakha, Hakha in Mandalay sizung ah an kuatsawng.

Lu lam khawngaw ti cu mumal neiloin a um ih a sung le pawl in an kil ringring nan August 7 ni ah ka zuun ka thawh duh a tiih an hmulo sungah a tlansuak.

An theih veten palik zung le FBC Mandalay hnen ah thuthannak an nei cih ih mihlo hawlnak caphek rialsuak in an hawl thok. Mandalay um rinsantlak Chin mi tamzet khalin an buaipi ih social media lam khalah a hlo thu an tarlang.

Ahlo hnu nikhat rei ah Kawl innsang pakhat in an inn kiangah an hmu nan, zo a si ti an theilo ruangah an rak zoh liam men. Cuhnuah mihlo hawlnak ca an hmusuak ih a hawltu pawl hnen ah an sim thei lohli. Ṭuanvo neitu pawl in an hmunak kiangkap ah an va hawl nan a rak um nawn lo.

Mizoram ih um Pa Thawm unau pakhat cun, “theihtawk suah in unau sungkhat le Mandalay um rinsantlak Chin mi pawl in an hawl nasa nan an hmu thei hrih lo. Zarhte ni ah Kawl innsang pakhat in an inn kiangah an hmu nan zo a si ti an theilo ruangah an rak zoh liam men. Lehhnu ah mihlo hawlnak Ca an hmu hnu lawng ah a mah a si ti an theiih caphek par ih phone number ah an biak cih nan, an hmu nak kiangkap ih an va hawl ahcun a rak um nawn lo.”

“A Lu le Ke a khawngaw tlun ah a el ruh a pelh ih thir thawn kai cawp mi a si. Cuti cingin a vaksuak thei thotho mi cu doctor pawl khal an mangbang zet” a ti.

Pa Thawm cu innsang fanau nei a siih, tukhalah, an hawl rero ih an hmuh theizang dingin le a dam lohli theinak dingin thlacamnak thawn bawmcio uhsi.

A hmutu kan um pang a si le himi phone number (09258881844 09-402550209) ah simthei dingin zangfah kan lo dil a si.

Leave a Reply

Your email address will not be published. Required fields are marked *