Midamlo besia pakhat ruangah Falam Siizungpi OPD an phit sung

Falam Siizungpi Outpatient Department (OPD) cu Covid 19 rinhleh mina pakhat an hmu ruangah a lang te sung an phit lawk tiah theih a si.

Falam Siizungpi OPD ih mina an luhpi tikah Covid nat pianhmang a nei le neilo screening zohciangnak an neita ṭheu nan, January 22 ih mina besia deuh an luhpi mi cu screening zoh nam loin an luhpi cih. Curuangah Covid 19 nat a nei pang ah ti`n ralrinnak ah Falam Siizungpi OPD cu an phit sung lawk a si.

Falam Siibawipi Dr. Tluang Cung Thang in “OPD ah mina kan zoh ding a si le screening timi COVID nat pianhmang zoh hmaisanak kan nei ta ṭheu. Atui mina cu a roh deuh tikah screening tuah ta man loin luhpi cih a si ruangah Covid nathrik a nei pang ahcun a pehparmi zate hnen ah check thluh a si ding ruangah kan phit sung nak a si” tiah Chinland Herald daily news hnen ah asim.

Mina cu Covid 19 test kit thawn an check nan negative in a lang. Asinan, a dinhmun ah Covid nat pianhmang vek deuh a lang ruangah a SWAB cu hmundang ah zoh bet dingin an kuat.

SWAB result ah nathrik a um lo ti`n a fiang hnu lawng ah Falam Siizungpi OPD cu a keel ten an ong sal ding a si.

Leave a Reply

Your email address will not be published. Required fields are marked *