May 14 Doawknak ah CDF Mindat mino 4 nunnak liam, 8 luan in hliam tuar

CDF Mindat le SAC ralkap doawknak cu May 12 ihsin an nei pehzom vivo ih tuisun May 14 lawngah CDF Mindat mino 4 an thi zo thu ṭuanvonei mipakhat in zaan nazi 9 hnu ah Myanmar Now hnen ah a sim.

Hliam tuar khal 8 hnakih mallo an um tiah theih a si ih CDF Mindat ih ṭuanvonei mipakhat khalin SAC ralkap lam khalah mi 5 hrawng an thi tiah a sim ve.

Mindat khuapi hum in nunnak liamtu Paralṭha 4 cu kum 20 kiangkap mino hlir an si tiah theih a si ih an thuhla cipciar cu an phuang tel lo.

Mizaan khalah SAC ralkap kut tuar in kum 20 kim hrih lo tlangvalno mipakhat nunnak a liam ih tui`ni nunnak liam mipali thawn nihnih sungah CDF Mindat lam in mi 5 an thi zo a si.

Mindat khua ah May 13 in Martial Law an phaung ih meithal tum le ralkap dang cah belh in SAC ralkap cun Mindat Civil Defense Force cu nasaten an kap.

May 14 zaanlamri khalah helicopter 2, Fighter vanzam 1 le thlingthlatu Drone vanzamte 2 hmangin Mindat khua tlun ah an zam ih boruak an thlir phah rero tiah a hmutu pawl in an sim.

Zaanlamri ih Mindat nisuahnak lam ih kahdonak cu zaan nazi 9 hrawngah a dai zo tiah Mindat Ukhruaitu pawlkom in thuthang an suah ih nitlaknak lam ih kahdonak cu an nei pehzom rero tiah an tarlang.

Leave a Reply

Your email address will not be published. Required fields are marked *